Dang shah set  sah ki MLA ka TDP hapoh ki ïingsah hadien ba la shahkem u Naidu

Amaravati, Nailur:

Ha ki 72 kynta ba la leit, ka sorkar jong ka jylla Andhra Pradesh ka la hukum ba la dei ban set hapoh ïing ïa baroh 19 ngut ki MLA jong ka seng TDP.

Ki heh pulit ki la leit ban jurip bniah  ïa ki ïing jong kine ki MLA bad jong kiwei pat ki riewpawkhmat jong ka seng TDP ha ka step jong ka sngi Saitjaiñ, ym slem hadien ka jingshahkem jong u nongïalam jong ka seng bad u Myntri Rangbah barim jong ka jylla u N Chandrababu Naidu, ha Nandyal.Wat lada ïa u Naidu la pynkynriah na Nandyal bad ïalam shapoh ka ïingbishar ha ka sngi U Blei, ki MLA jong u bad kiwei pat ki nongïalam ki dang shah set kut hapoh ki ïing jong ki.

Kane ka jingpyntreikam ka dang bteng haduh ka lah sngi U Blei, naba ka seng TDP ka la khot pynlong da ka jingïakhih ha baroh kawei ka jylla ban pyrshah halor ka jingshahkem bad ka jingshah set kaba 14 sngi jong u.

Ka jingbuh ïa ki jingpyrkhing bad ka jingkem ïa ki nongïalam kiba hakhmat eh jong ka seng, ka la long naba ka jingkhot ïakhih ha ka lah sngi U Blei ka la wanrah ïa ki jingkulmar ha ki bynta ba bun jong ka jylla.

Ki MLA jong ka seng TDP ki la shah pyrkhing ban ïakynduh ïa ki para dkhot ne ki bahaïing jong ki, bad ki pulit ki la khang ruh ban pynlong ïa ki jingïalang bad ki jingïaid paidbah ha baroh kawei ka jylla.

La pyntreikam shuh shuh ïa ki shipai ban pahara ha ka jylla kum shi bynta ban khanglad ïa ki jingïakhih.