Imphal, Nailur:
Ki la don kumba lai ngut ki briew, ïa kiba la ïoh jingtip ba ki dei kiba na ka kynhun jait bynriew Kuki-Zo ha Manipur, kiba la ïap na ka jingshah siat ha ki riewkieng atiar ki bym shym la lah ban ithuh.
Kane ka jingïasiat ka la jia ha ka por 8:30 mynstep jong ka sngi Ba-ar ha ka thaiñ Kanggui ha Kangpokpi distrik jong ka Manipur.
Ïa kine ki lai ngut kiba la ïap la tip kyrteng kum u Satneo Tuboi, Ngamminlun Lhouvum bad u Ngamminlun Kipgen.
Hashwa kane, ki kynhun ïada khappud ki la buh ka jingmaham pyrshah halor kine ki kam runar jong ki riewkieng atiar ha ka jylla.
Kumba la ïathuh ka tyllong khubor, la ong ba ki shipai ïada ri ki la ong ba ki dkhot jong ki kynhun ba la shah ñiew beaiñ ki la ïalum lang ha ka kynhun ba la pynlong ïa ka jingïakhih kum shi bynta ban pynjur ïa ka jingïakhih ha ka jylla.
Kane ka jingmaham kaba la wan na ki bor pahara jong ka sorkar kmie ka la long hadien ba la jia ka jingïania hapdeng ki nongïakhih bad ki shipai ïada ha ka shnong Molnoi hajan Pallel ha Tengnoupal distrik jong ka Manipur ha ka taïew ba la lah.
Ki dkhot kiba dei jong ki kynhun ba la shah ñiew beaiñ kiba kynthup ïa ka United National Liberation Front (UNLF) bad ka People’s Liberation Army (PLA) ki la shah kynnoh ba ki la long shi bynta jong ka kynhun u paidbhur ha kaba la mih ka jingsiat ïa u heh shipai ha kaba ka la pynmynsaw jur ïa u ha Manipur, la pynshisha ka tyllong khubor.
