Guwahati, Nailur:
Ki pulit ha Kamrup distrik jong ka Assam ki la ïoh ban kurup ïa ka song jong u Heroin ba 2.2 kilo uba la kot sha ka T. 18 klur. Ïa kine ki mar la ïoh ban kurup hajan ka nongbah Guwahati ha ka thaiñ Amingaon ha Kamrup distrik jong ka Assam ha ka miet jong ka lah sngi U Blei.
Ïa u Heroin la song ha kiba bun ki synduk sabon ïa kiba la don kumba 170 tylli bad ïa kine la buhrieh ha ka bynta jong ka kali Mahindra Thar. Ki la don kumba 6 ngut ki briew ha kaba lai ngut ki dei kiba na shabar ka Assam bad lai ngut kiba na ka jylla kiba la shahkem ha kaba ïadei bad ka jingïoh kurup ïa u drok.
Ïa ki song jong u Heroin la ïoh ban kurup ha ka jingpyntreikam ba la lamkhmat da u DIG jong ki pulit ka Assam u Dr Parthasarathi Mahanta bad u ASP ka Kamrup u Kalyan Kumar Pathak. Ka la long hapoh ka jingïatreilang jong ka kynhun Special Task Force (STF) ba dang lah thaw thymmai jong ki pulit ka Assam bad ki pulit jong ka Kamrup.
