Kohima, Nailur:
Ka Nagaland Assembly ha ka Lah Sngi U Blei ka la pyrshah halor ka jingthmu ban wanrah da ka Uniform Civil Code (UCC) bad ka jingpyntreikam jong ka Forest Conservation (Amendment) Act bad pan ka jingïada hapoh ka jingtreikam jong ka 16-Point Agreement and Article 371A.
Baroh ki seng saiñ pyrthei kiba kynthup ïa ka seng Nationalist Democratic Progressive Party (NDPP), BJP, NCP, NPP, LJP (Ram Vilas), Naga People’s Front (NPF), RPI (Athawale), JD(U) bad ki seng shimet ban ïakren halor kine ki mat ha ka sngi kaba nyngkong ba la sdang ka dorbar Lyiur.
U MLA jong ka NPF u Kuzholuzo Nienu u la ong ba ki Nagas ki la don hapoh ka jingïada kaba kyrpang jong ka Article 371A bad namar kane ka daw ka la donkam ban ïakren halor ka UCC bad ka Forest Conservation Amendment Act.
“Ka Article 371A ka la batai shai ba ym dei ban don ka aiñ jong ka Parliament ka ban treikam ha ka jylla Nagaland ha kaba ïadei bad ki niam ne ki dustur jong ki Naga, ki kyndon bad ki rukom pyntreikam, ki bor sorkar bad ki aiñ ki kanun ki don hapoh ki rai jong ki kyndon ba la buh ki Naga bad ka jinglong trai bad ka jingai jaka puta bad ki jingdon jingem hapoh jong ki kim lah ban shah kam trai katba ym pat rai da ka State Assembly,” u la ong bad tyrwa ba ka Ïingdorbar ka la ai ïa ka rai ban pyrshah halor ka UCC bad ka Forest Act.
