New Delhi, Nailur:
Hadien ba la pynlong ïa ka jingpyntreikam pyrkhing ha ki bynta jong ka International Border ha Punjab, la shem ba ki nongkhaïi drok ha Pakistan ki la sdang ban shu pynhap na suiñ ïa u Heroin ha ki bynta khappud ha Rajasthan bad Gujarat, la ïathuh ka tyllong khubor kaba la wan na ki kynhun jong ka sorkar kmie bad na ka tnat shipai Border Security Force (BSF).
Kumba la ïathuh ka tyllong khubor, la ong ba ka kynhun shipai BSF ka la buh jingthoh ha kaba ïadei bad ka jingïoh ban kurup bun ïa u drok, ha kaba kham bun na kine u dei u Heroin, ha Rajasthan bad ha Gujarat, kaba la long kumjuh kumba la phah jingthoh da ki kynhun jong ka sorkar kmie ruh.
Katkum ka jingïohlum jingkheiñ ba la phah da ka Ministry of Home Affairs la paw shai ba, ha u snem 2020, ka tnat shipai BSF ka la ïoh ban kurup ïa shibun u Heroin ba la ïoh ban kurup na khappud India-Pakistan ha Gujarat.
Hynrei ha u snem 2022, la ïoh ban kurup da kumba 49 kilo u Heroin da ka kynhun shipai kiba la pynlong ïa ka jingleit jurip bniah.
Kumba la ïathuh ki heh ba dei khmih, la ong ba kiba bun na ki jingsong jong u drok ki dei kiba la thmu ban phah sha Punjab. Kumjuh, ha ki bynta jong ka International Border ha Rajasthan, ki shipai BSF ki la ïoh ban kurup kumba 8 kilo u Heroin ha u snem 2020 bad lajan 64 kilo ha u snem 2021.
Naduh ba sdang jong u snem 2023, ka tnat shipai BSF ka la ïoh ban kurup kumba 44.5 kilo u Heroin na khappud.
