Lucknow, Nailur:
Na ka jinghap jong u slap uba jur ha ki 36 kynta ha kiba bun ki bynta jong ka Uttar Pradesh, ki la don kumba 56,000 ngut ki nongshong shnong kiba la shah ktah na ka jingshlei um.
U Aditi Umrao, uba long u Project Director ha Relief Commissioner’s Office, ha kaba ïadei bad kane, u la ong ba ki jingpyntreikam ha kaba ïadei bad ka jingai jingïarap bad ka jingpyllait im ïa ki briew kam pat sdang.
Kumba la sakhi, la ong ba ki la don baroh kumba 19 tylli ki thaiñ kiba don ha ki 10 tylli ki distrik, kiba kynthup ïa ki 173 tylli ki shnong, kiba la shah ktah na ka jingshlei um, ha kaba kane ka la ktah ïa kumba 55,982 ngut ki briew tang ha ka shi sngi jong ka jingwan hap jong u slap ha kylleng ka jylla.
Ka Relief Commissioner’s Office ka la pynshisha da kaba ong ba ka tnat ka la pynkhreh bha na ka bynta ban pyntreikam ha kaba ïadei bad ki lad ai jingïarap sha kito ki nongshong shnong kiba donkam.
“Kumba ka long mynta, la ong ba ki jinglong jingman ki la buh jingeh ïa ki bor ba dei khmih namar ba ym pat ïohlad ban ïakynduh ïa ki nongshong shnong namar ka jingjur jong ka jingshlei um. Ha kaba ïadei bad kane, ngi la ïoh tip ïa ki katto katne tylli ki jaka ha kaba la dei ban tyrwa bad ai jaka sah ïa ki lanot shlei um bad kine ki jaka ki la pynkhreh bad la dep ban pynbiang ïa ki jingdonkam. Ngim pat ïoh ban pyntreikam ïa ki haduh mynta,” la ong u Umrao.
