Kolkata, Nailur:
Kum shi bynta ban kynthoh jur ïa ka sorkar kmie ha kaba ka la ong ba ka jingpynibor jong ka, ka la long tang ka jingleh kam saiñ pyrthei, ka Myntri Rangbah jong ka West Bengal ka Mamata Banerjee ka la ong ha ka Lah Sngi U Blei ba ki briew jong ka seng jong ka kin sa leit ban duwai ha Rajghat, lada jia bym ai jingbit ïa ki na ka bynta ban pynlong da ka jingïakhih ha kane ka jaka ha ka sngi ba la rakhe ïa ka sngikha jong u Mahatma Gandhi.
Ka la kynnoh ruh ba ka jingkhot hajir ba la phah da ka kynhun Enforcement Directorate jong ka sorkar kmie sha u khun kha jong ka bad u nongïalam jong ka seng TMC u Abhishek Banerjee halor ka jingkynnoh ba u la donkti ha ka kam klop tyngka na ka jingthung kam ha ka skul bad kumjuh ha kawei pat ka mukotduma kaba ïadei bad ka jingdon jong ka jingkhaïi masi, bad ong ba kane ka long tang ka jingleh donbor pyrshah ïa une u nongïalam.
Ka heh nongïalam jong ka seng Trinamool Congress kaba la don bynta ha ka thma ktien bad u Lat ka jylla u C V Ananda Bose halor kiba bun ki mat, ha kaba ïadei bad kane, ka la pyllait paidbah ïa ka shithi ba la phah da u sha ka sorkar jylla bad sha ka, ha kaba la ong ba u la phah ka jingai khublei bad kitbok jong u na ka bynta ka jingleit jingleit jong ka shabar ri ha kine ki sngi.
” Ka Banerjee hynnin ka sngi ka la mih ban leit jngoh ïa ka Dubai bad sha Spain na ka bynta ban leit pan jingkyrpad na ka bynta ka jingbei tyngka. “Nga la leit shabar ri hadien 5 snem: ngam shym la ïoh jingbit hashwa ba ngan leit jingleit shabar ri, wat lada nga la shah khot bad shah wer sngewbha da bun bun sien,” la shuh shuh ong ka Banerjee.
“Ki pulit jong ka Delhi kim shym dei ki nongshun jong ngi, hynrei kim shym la lah ban ai jingbit ïa ngi na ka bynta ban pynlong ïa ka jingïakhih ha Rajghat naba kane ka long ha ka kyrteng jong ka kam saiñ pyrthei…Ha kaba ïadei bad kane, ngi la thmu pat ban leit duwai ha katei ka jaka, ha kaba ka dei ka bynta ban hap ban ailad na ka bynta kane,” la ong ka Banerjee ha ka jingïakren bad ki nongthoh khubor.
Ka seng TMC ka la dep ban pan jingbit na ka bynta ban pynlong da ka jingtohkit ban pyrshah halor ka jingbym pyllait ïa ka jingsiew jong ka NREGA ïa ka Bengal, da uba bun balang ha ki lai tylli ki jaka kiba don ha Delhi kynthup ha Rajghat ha kaba la buh ïa u dpei jong u Gandhi.
