New Delhi, Nailur:
U Myntri ka tnat ïada ri u Rajnath Singh ha ka sngi Ba-ar u la plie paidbah ïa 90 tylli ki Project kiba ïadei bad ki surok, ki lynti rel, ki kad liengsuiñ, ki jingkieng bad kiwei pat ha kaba kine baroh ki la kot sha palat T. 2,900 klur. ïa kine projek yn pyntreikam ha 9 tylli ki jylla bad ar tylli Union Territory.
Ki Project da ka Border Roads Organisation (BRO) ki kynthup ïa ka Nechiphu Tunnel ha Arunachal Pradesh, ar tylli ki kad liengsuiñ ha West Bengal, ar tylli ki jaka hiar Helicopter, 22 tylli ki surok bad 63 tylli ki jingkieng.
Na kine ki 90 tylli ki Project ba la wanrah ban pyntreikam, 36 tylli ki dei ki ban pyntreikam ha Arunachal Pradesh, 26 tylli ha Ladakh, 11 tylli ha Jammu & Kashmir, 5 tylli ha Mizoram, 3 tylli ha Himachal Pradesh, mar 2 tylli ha Sikkim, Uttarakhand, bad West Bengal, bad mar kawei ha Nagaland, Rajasthan, bad Andaman and Nicobar Islands, la batai shai da ka tnat ïada ri.
U Rajnath Singh u la pyllait paidbah ïa ki Project ha ka lympung ha Samba distrik jong ka Jammu & Kashmir.
