Shillong, Nailur 14
Ka Adventure Hynñiew-trep Off Road (AHOR) kan pynlong ïa ka jingïakob ñiah kali ba la tip kum ka 5th Ahor 4×4 Off-road Challenge 2023 naduh 19 haduh 21tarik u Risaw mynta u snem ha Kharsati Park kaba ha Umtham, Ribhoi District.
Ha kane ka jingïakob ka ban neh lai sngi kin don haduh lai tylli ki jingïakob kum ka Modified category, Semi Modified category bad ka Stock category.
Wat la ka khusnam ha kane ka jingïakob ka long tang T. 5 lak na ka bynta baroh ki nongjop, hynrei kane ka synjuk kam shym la kynran dien ban ïaid shakhmat ïa kane ka jingïakob mynta la san sien.
“Ka jingbuh ka jong ngi na ka bynta katei ka khusnam kaba tang T.5 lak ka long kat kum ka jingïoh ki lad jingïarap lyngba ka tnat Tourism. Ha ka jingshisha ngi la pyrshang ban ïoh jingïarap na ka tnat ïalehkai jong ka Sorkar Jylla bad kumjuh na ka North Eastern Council (NEC), hynrei haduh mynta ngim shym pat shym la ïoh jubab eiei. Lada ngi ïoh jingïarap sa na kine ngi lah ban pynheh biang biang ïa ki khusnam pisa na ka bynta ki nongjop,” la pynpaw u President u Bah Damian D. Umdor haba pynpaw ha ki lad pathai khubor ha ka sngi Palei.
“Wat la ka khusnam ka long kaba rit, hynrei ngi hap ban pynbiang ïa ki nongwan ïashim bynta naduh ki sopti T-shirt, ka bam ka dih bad kiwei ki jingdonkam,” la bynrap sa u General Secretary u Bah Ferdinand Jahrin.
Kane ka klob ka la wer ïa ki nongïashim bynta na ka Jylla bad ruh kiba nabar Jylla ba kin wan ïashim bynta ha kane ka jingïakop ka ban long ka jingplie lad ïa ki ba kin ïoh kalad ban ïashim bynta ha ki jingïa-kop shabar jylla.
Kane ka klob ka la ïathuh ba haduh mynta ki la 20 ngut kiba la dep ai kyrteng. “Ngi khmih lynti ba kin don haduh 70 ngut ki nongïashim bynta kynthup ïa kiba nabar kum na Assam bad Sikkim. Ha u snem ba la lah ki don 60 ngut ki nongwan ïashim bynta,” la ong u Bah Ferdinand.
