Aizawl, Nailur:
Kum shi bynta ban leh eiei hadien ba la ïohpdiang ïa ka khubor na ki kynhun wad bniah, ki shipai ka tnat Assam Rifles bad ki pulit jong ka Mizoram ki la pynlong ïa ka jingleit khynra ha ki bynta jong ka thaiñ Tlangpuikawn ha Siaha distrik bad ha kane ka jingpyntreikam ki la ïoh ban kurup ïa shibun ki tiar siat.
Hadien ba la ïoh khubor shaphang ka jingdon ki briew kiba rah ïa ki tiar siat na Archung (Lawngtlai distrik) sha Lawngtlai, ka kynhun jong ki pulit bad ki shipai ha ryngkat ka jingïatreilang ki la buh da ka Check Post.
Ka kynhun ka la pynlong ïa ka jingkhmih bniah ïa ki kali ar shaka ïa kiba la shah suba ha ka Check Post kaba don hajan Tlangpuikawn bad ym slem hapoh kane ka jingkhmih bniah ki la ïoh ban kurup ïa kumba 1800 tylli ki kuli jong ka suloi AK 47.
Ha kaba ïadei bad kane ka jingjia, lai ngut ki briew kynthup arngut ki nongshong shnong jong ka Myanmar ki la shahkem halor ka jingrah ïa kine ki tiar siat. Ïa kine ki tiar ba la ïoh ban kurup la aiti sha ki pulit jong ka Siaha.
