Jowai, Nailur 14
Ka Shangpung Khliehmuchut ka la jam sha ka semi final jong ka lympung ïalehkai 2nd Division Football Tournamnet na ka bynta ka 6th Debo Shullai Memorial Trophy ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka lah pynliem noh ïa ka Khliehmynkrem da 1-0 kol ha ka jingïakhun quarter final kaba la long madan Kiang Nangbah Stadium Ladthadlaboh, Jowai ha ka sngi Palei.
Haba phai sha ka jingïakhun ka long kaba itynnad bad ïakhaid bha kat haduh ba ka kylla step ka la kut noh khlem da ïoh ban thep kol. Haba wan phai sha ka kylla miet, ka jingïalehkai ka la nang ïathnem na baroh arliang, naduh ka rukom pashat bad pyllait bol.
Hynrei dei hashwa ban kut noh ka por ïakhun, ka Shangpung Khliehmuchut ka la ïoh ban thep kol lyngba u Banteilut Langstang ha ka minit kaba 90+3 kaba la biang pura ïa ka Shangpung Khliehmuchut ba kan khur nam jop.
Katba ha ka lympung ïalehkai (L) Kesilroy Pala Invitation Football Tournament 2023, ka 7 Wasa FC ka la pynliem ïa ka Jarain FC da 2-1.
Ïa ki kol jong ka 7 Wasa FC la thep da u Niponghi Sumer ha ka minit 48, u Samehi Ryngki ha ka minit 76. Katba ka shi kol jong ka Jarain FC la thep da u Oresterwell Langshiang ha ka minit kaba 44.
