Mumbai, Nailur:
Ka ïingbishar ha Mumbai ha ka sngi Palei ka la ai hukum ban set ïa u nongseng jong ka Jet Airways u Naresh Goyal da kumba 14 sngi ha patok na ka bynta ban pynlong ïa ka jingtohkit kaba bniah ha kaba ïadei bad ka jingdon jong ka jingkamai ïa ka spah bymhok kaba ïadei bad ka jingleh thok ïa ka pisa kaba la kot sha ka T. 538 klur ha Canara Bank.
Ka kynhun Enforcement Directorate (ED) ka la kem ïa u Goyal ha ka 1 tarik, Nailur hapoh ka jingtreikam jong ka Prevention of Money Laundering Act (PMLA) hadien ba la kylli jingkylli ïa u ha ka jaka treikam jong ka kynhun tohkit kaba don ha Mumbai. Une u heh spah uba la don 74 snem ka rta u la shah ïalam hakhmat ka ïingbishar ha bakut ka sngi ba la set bad tohkit da ka kynhun EC ha ka sngi Palei.
Ïa u Goyal la phah noh ban set da ka hukum jong ka ïingbishar naba kam don shuh ka jingpan por shuh shuh jong ka kynhun ED na ka bynta ban bteng ïa ka jingtohkit.
Ïa ka jingdon jong ka jingkamai ïa ka spah bymhok la paw lyngba ka jingmudui ejahar jong ka kynhun Central Bureau of Investigation (CBI) pyrshah ïa u Goyal jong ka Jet Airways, ïa ka kurim jong u ka Anita bad ïa katto katne ngut ki nongpynïaid barim jong ka kompeni jong kane ka Private Airline kaba mynta ha kaba la kynnoh ba ka la don ka jingklop kaba T. 538 klur ha Canara Bank.
