Ranchi, Nailur:
Ha ka sien kaba nyngkong jong ka jingpyntreikam, ka sorkar Jharkhand ka la pynbna ba kan sa pynbiang da ki kali ar shaka sha baroh ki heh nongïalam shnong ha nongkyndong kum ha Manki-Munda, Majhi, Jog, Godet, Parganait bad kiwei pat.
U Myntri Rangbah jong ka jylla u Hemant Soren ha ka por ba u la ai jingkren ha kawei na ki jingïalang ha East Singhbhum ha ka sngi Ba-ar u la pynbna ba nalor ka jingpynbiang ïa ki kali ar shaka sha ki nongïalam shnong, un sa pynshna ïing ruh na ka bynta jong ki.
U Soren, u la ai jingkren ha ka jingïalang kaba la ïalum na ka bynta ka prokram ba la pynïaid na ka bynta ban kynmaw ïa ki briew kiba la ïap martir ha Kurukocha kaba don ha Chakulia ha East Singhbhum distrik. Kum shi bynta ban kynmaw burom ïa kane ka sngi, u Myntri Rangbah u la sam da ki kali ar shaka sha ki katto katne ngut ki heh nongpynïaid shnong.
