Shillong, Nailur 15
Ka Christ Church Morning School,Mawlai Syllaikariah ka la long ka lahduh ha ka lympung ïalehkai ba la tip kum ka IX Inter School Knock Out Football Tournament 2023 ba la pynïaid da ka Federation of Khasi Jaiñtia and Garo People (FKJGP), Mawlai Circle.
Kane ka la wan urlong hadien ba ka lah ban pynliem noh ïa ka Umrynjah Presebyterian Secondary School, Umrynjah da 2-0 kol ha ka jingïakhun final kaba la long ha ka sngi Thohdieng ha madan Heh Mini Stadium.
Ïa kitei ki ar kol la thep da u Precious Muktieh ha ka kylla miet hadien bym shym la don kiba lah ban ïathep kol ha ka jingïakhun jong ka kylla step.
Kane ka dei ka sien kaba nyngkong ïa ka Christ Church Morning School ba kan ïoh rah ïa kane ka nam ha ka Inter Skul jong ka FKJGP, Mawlai.
Ïa ka nam Promising Player la ïoh khur da u Medonryngkat Kharum-nuid (Mayqueen SS), Top Scorer (nongthep kol buntam) ka la leit sha u Kitborlang L. Marshil-long na ka Christ Church Morning School, Best Goalkeeper ka la leit sha u Damanbha Warjri na ka Umrynjah Presby-terian, Best Player ka la leit biang sha u Kitborlang bad ïa ka nam Best Discipline Team la ïoh ban khur da ka Mayqueen Secondary School.
Ha kane ka jingïakhun final la sakhi lang u Bah Eldie N. Lyngdoh, Gene-ral Secretary ka FKJGP, Sengkmie kum u kongsan, u Kitborlang Nongphlang, Vice President ka FKJGP, Sengkmie kum u symbud kongsan, ha ka jingdon ryngkat u Bah Tamdor Nadon kum uba shah khot sngewbha, Bah Khrawkupar Nongsiej, President FKJGP, Mawlai Circle, Bah Johny Khongsit, Bah Shanbor Rapsang, Bah Dunli Majaw, kiba la sam ïa ki khusnam bad ki medal, ki nonghikai jong ki skul bapher bapher, ki khynnah skul bad kiwei kiwei.
Kum ban shu pynkynmaw ha kane ka lympung ki la don baroh 15 tylli ki skul kiba la wan ïashim bynta. Ka phang pdeng kaba ka FKJGP Mawlai Circle ka la ai mynta u snem na ka bynta kane ka lympung ka long “Say no to Drugs, say Yes to Football” ne “Ong em ia u Drug, Hooid ia ka Football.”
