Shillong, Nailur 15
Ka Mawkriah West SC ka la pynliem noh ïa ka Diengpasoh SC da 1-0 kol na ka bynta ban khur ïa ka jingjop ha ka lympung ïalehkai SSA U-20 4th Division Football League 2023 ha ka sngi Thohdieng ha madan Polo.
Kane ka nam jop ka la wan urlong lyngba ka shi kol ba la thep da u Lavrence Jeremy Nongbri ha ka minit kaba nyngkong.
Haba phai sha kawei pat ka jingïakhun kaba la long kham hashwa hapdeng ka Risa Colony SC bad ka Mawlyngngad SC ki la ïasam mar shi point hadien ba ïakhaid mar 1-1 kol.
Wat la kine ki kynhun kim shym la lah ban thep kol ha ka kylla step, hynrei ka Mawlyngngad ka la ïoh ban pynkhih jar nyngkong ha ka kylla miet lyngba u Donryngwat Nongkhlaw ha ka minit kaba 61. Hadien hynriew minit ka Risa Colony ka la lah ban pynïakhaid kylla lyngba u Wellborn Pyngrope.
Ha ka sngi Saitjaiñ ka jingïakhun ka long hapdeng ka Iatyllilang SC pyrshah ïa ka Umrynjah SC ha ka por 3:15, katba ka Madan S&CC ïa ka Lamlynti SC ha ka por 4:45 janmiet.
