Shillong, Nailur 15
Ka Shillong Cricket Association kan ïaknieh ïa ka nam lahduh pyrshah ïa ka Ri-Bhoi District Cricket Association ha ka final jong ka U-19 Girls Inter District Cricket Tournament ba la pynïaid da ka Meghalaya Cricket Association, ha ka sngi Saitjaiñ ha madan Umbuda, Nongpoh.
Ha ka jingïakhun semi final ba ar kaba la long ha ka sngi Thohdieng, ka SCA ka la lah ban pynliem noh ïa ka Tura DCA da 129 run. Katba ha ka sngi Palei ka Ri-Bhoi ka la jop ïa ka South Garo Hills DCA da 3 wiket ha ka semi final kaba nyngkong.
Ka Jennyfer Fancon ha kane ka jingïakhun ka la ïoh ban khur ïa ka hat-trick kaba nyngkong eh ha kane ka lympung bad pynlong ïa ka SCA ban pynkhyllem lut ïa ki nongtied ka Tura na ka bynta ban kamai tang 45 run katba ka la lah ban pynbud da 175 run na ka bynta ban khur ïa ka jingjop. Hynrei, ia ka nam Player of the Match la khur da ka Monica Singh, kaba la lah ban tied 50 run khlem shah pynkhyllem hashwa ba kan khur 4 wiket ha ka jingkawang bol.
Ha kane ka jingïakhun ka Tura ka la jied ban kawang bol shwa hadien ba ka la jop ïa ka kynting pisa, hynrei ka SCA ka la lah ban buh ïa ka thong da kaba kamai 174 run bad shah pynkhyllem 6 wiket ha ki 25 over. Ka Monica ka la khyrwit 50 run na ki 55 bol, kynthup ïa san tylli ki ‘four’ bad kawei ka ‘six’, katba ka Jayshree Singh ka la tied 33 run. Kine baroh ar ngut ki la lah ban kamai 51 run tang ha ki 5.3 over. Ka kapten jong ka Tura ka Awesa G Momin (2/15) ka la khur ar wiket ha ki 5 over.
Haba wan shimti ïa ka pali ban kawang bol, ki nongkawang ka SCA ki la lah ban ïalehkai bha na ka bynta ban pynkhyllem ïa baroh ki nongtied ka Tura bad kamai tang 45 run ha ki 15.1 over. Ka Pillika R. Marak ka la long tang marwei kaba la lah ban tied 12 run (not out) na ki 16 bol.
Ka Fancon ka la long tang marwei ban kawang bol ar over bad ka la lah ban pynkhyllem ïa lai ngut ki nongtied ka Tura. Ha kawei pat ka liang ka Monica ka la khur 4/13 ha ki 4.1 over bad ka Jayshree (1/14) ka la khur shi wiket.
