Shillong, Nailur 15
Lai ngut ki rangïakura kin pynkhreh ban leit ïashim bynta sha ka rynsan ïakura ba la tip kum ka United Professional Boxing ban pynlong da ka Indian Boxing Council.
Kine ki kynthup ïa u Shanborlang Marbaniang u ban ïakhun mynta ka Sngi Saitjaiñ (16 tarik) pyrshah ïa u Adil Rajesh Kumar Singh uba na Delhi ha ka kyrdan ïakura jong ka Super Flyweight 52kg ha ka nongbah Delhi.
Katba u Ïarapborsing Kharbani bad u Elbin Rani ki ban ïakhun ha Gujarat ha ka 24 tarik mynta u bnai. U Ïarapborsing un ïakhun pyrshah ïa u Devavath Anil Kumar uba na Hyderabad ha ka kyrdan ïakura jong ka Bantamweight 53.5kg, katba u Elbin Rani un ïakhun pyrshah ia u Saleem Khan uba na Jammu & Kashmir ha ka kyrdan ïakura jong ka Featherweight 57kg.
Kumba ka paw kane ka dei ka sien kaba san ïa u Shanborlang ban leit ïashim bynta ha katei ka rynsan ïakura bad ha ki jingïakhun kiba la dep u la jop ar sien bad ïakhaid ar sien. Katba u Ïarapborsing un leit ïashim bynta ha ka sien kaba ar bad ha ka sien kaba nyngkong u la shah rem.
Kine ki rangïakura ki la pynpaw ba ki la long ba la pynkhreh bha na ka bynta katei ka rynsan ïakura namar kiwei ki nongïakura kiba nabar Jylla ki long kiba khlaiñ bor. Te kumta ki la pynpaw ïa ka jingkhmih lynti ban ïalehkai bha khnang ba kin ïoh kheit ïa u soh ka jingjop.
Na ka liang u coach uba ai jinghikai ïa ki, u samla Rishanlang Lyng-doh la pynpaw ba kine ki rangïakura ki la long ba la pynkhreh na ka bynta katei ka rynsan ïakura ha kaba ki la ïoh ban kilanmet kumba ar bnai kynthih.
“Kine ki khynnah ki la trei shitom na lade run watla nga la ïoh ban ïarap ha ka ban ai jinghikai ïa ki. Ym tang ma nga, hynrei ki nongialam ka Meghalaya Professional Boxing Council ki la ïatrei shitom lang ban pynbit pynbiang ïa kine ki khynnah hashwa ba kin leit ïashim bynta.”
“Kum u Coach nga khmih lynti ba kin ïalehkai bha khnang ba kin Ïoh ban kheit ïa u soh ka jingjop.”
