Chennai, Nailur:
Ha kaba ïadei bad ka jingshahkem jong ki 17 ngut ki nongtong dohkha ka Tamil Nadu ha Sri Lanka, u Myntri Rangbah ka jylla u M K Stalin ha ka sngi Palei u la kyntu ïa ka sorkar kmie ba ka la dei ban phah pyllait noh kham kloi ïa ki.
Ha ka jingthoh ba la phah sha u External Affairs Minister u S Jaishankar, u Stalin u la ong, “hashwa kane, ki la don lai tylli ki lieng tong dohkha bad 17 ngut ki nongtong dohkha ka Tamil Nadu kiba la shahkem ha ki shipai duriaw jong ka Sri Lanka, ha kaba ki la shah kynnoh ba ki la leit ban tam ïa ki bynta jong u International Maritime Boundary Line (IMBL) uba don ha ki bynta jong ka um ha Sri Lanka.”
U Stalin u la kyrpad ïa u ba u la dei ban pynkloi ha ka ban ïakren bad ki heh ba dei khmih khnang ban lah ban pyllait noh kham kloi ïa kine ki nongtong dohkha kiba la shahkem.
“Kine ki nongtong dohkha, ïa kiba la ñiew ba ka kam tong dohkha ka dei ka kam kamai jakpoh jong ki, ki la ong ba don ki por ba ki la kum leit tam sha ki bynta jong ka um sha Sri Lanka namar ka jingbym paw shai ki jaka ba la phiah ïa ka bynta jong ka um.”
Kine ki jingïai bteng ha kaba ïadei bad ka jingshahkem jong ki nongtong dohkha ka Tamil Nadu ha ki shipai duriaw jong ka Sri Lanka ka la buh jingtieng jingsyier bad ka jingbym shngaiñ shuh jong ki nongtong dohkha.
Ka jingshahkem jong ki nongtong dohkha da ki shipai duriaw jong ka Sri Lanka ka la buh jingeh, ka la ktah ïa ka rukom im bad ïa ka kamai-kajih jong ki longïing jong ki.
U Myntri Rangbah u la ïai ban ban buh ka jingdawa ba la dei ban ïamir jingmut bad ki heh nongsynshar ban wanrah jingsuk ha ka jingim jong ki hajar ngut ki nongtong dohkha ka India.
