New Delhi, Nailur:
Ka kynhun National Investigation Agency (NIA) ka la pyllait ïa ki dur jong saw ngut ki lehnoh ïa kiba la suba ba ki la donkti ha ka jingjia ba la leh da ka kynhun lehnoh ISIS (Islamic State of Iraq and Syria) ha Pune bad rai ban ai khusnam da mar T. 3 lak na ka bynta ki briew kiba la ïarap ha ka ban ïohlad ban kem ïa kine ki lehnoh.
Ka kynhun tohkit ka la ong ba ïa ka jingpynithuh ïa kine ki briew kiba la ai ka jingïarap la buhrieh paidbah.
Ïa kine ki saw ngut la tip kyrteng kum u Mohammad Shahnawaz Shafiuzzama Alam ba la tip ruh da ka kyrteng kum u Shafi Ujjama Alam bad kum u Abdulla na Jharkhand, u Talha Liyakat Khan na Pune, bad u Rizwan Abdul Haji Ali bad u Abdulla Faiyaz Shaikh ba la tip ruh da ka kyrteng kum u Daiperwala, kiba baroh arngut ki dei na Delhi.
U Alam bad arngut kiwei pat kiba kynthup ïa u Mohammad Imran Mohammad Yunus Khan, 23, bad u Mohammad Yunus Mohammad Yakub Saki, 24, – ki la shahkem ha ki pulit jong ka Kothrud ha Pune ha ka 18 tarik, Naitung hadien ba ki la pyrshang ban tuh ïa ka kali ar shaka.
Katba ki pulit ki dang ïalam ïa ki sha ka jaka sah sha Kondhwa kaba don ha Pune na ka bynta ban leit wad ïa u Alam kine ki la kynthih na ka kali jong ki pulit bad lait phet.
Haba la kylli jingkylli na u Khan bad u Saki, ki pulit ki la ïoh jingtip ba kine ki briew ki dei na Ratlam kaba don ha Madhya Pradesh bad ki la shah kynnoh donkti ha kaba ïadei bad ka jingjia jong ki kam thombor jong ki lehnoh ïa kaba la buh jingthoh ha Rajasthan hadien ba la lap ïa ki tiar pynbthei ha ka kali ha u Lber jong u snem 2022. Kine ki la shah thong mar T. 5 lak ha ka khlieh jong ki, la ïathuh u heh pulit.
Ka kynhun Maharashtra Anti-Terrorism Squad (ATS) ka la shimti na ka bynta ban pynlong ïa ka jingtohkit ha ka 22 tarik u Naitung. Ha ka por ba la pynlong ïa ka jingtohkit kaba bniah, ka kynhun ATS ka la kem shuh shuh sa ïa kumba katto katne ngut ki briew ïa kiba la shah suba donkti ha ka jingjia, kynthup u Qadir Dastagir Pathan, uba long u IT Engineer, bad u SN Kazi, kaba don ha Kondhwa.
Ka kynhun tohkit ka la pynngat ïa kiba bun ki kyndon kiba hap hapoh ka Unlawful Activities (Prevention) Act pyrshah ïa u Khan, u Saki bad uwei pat uba la shah kynnoh donktilang.
Hadien u Khan bad u Saki la ong ba u Alam u la buh ïa kumba katto katne ka Acid ha Bopatghat hajan Kondhwa, ka kynhun tohkit ka la pan jingïarap na ka kynhun Bomb Disposal and Detection Squad bad kurup ruh ïa ka Acid bad kiba bun ki dawai Chemical ïa kiba la pyndonkam ha ka ban shna bom.
Ka kynhun ATS ka la ïoh ban kurup ïa kiba bun kiwei pat ki tiar bad lap ïa ka 500 GB Data ha ki Laptop bad ki Mobile Phone jong kiba la shah kynnoh kiba don ka jingïadei bad ki YouTube Video ha kaba ïadei bad ka jingshna ïa ki bom bad ki dur Google Image jong kiba bun ki jaka. Ïa kine baroh la phah sha ki kynhun ba dei khmih bniah, la ong ki heh ka kynhun.
