Khliehriat, Nailur 15
Ka Khliehmyntriang bad ka Rymbai Madanpynriang ki la rung sha ka semi-final ha ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA).
Kane ka la urlong hadien ba ka Khliehmyntriang bad ka Rymbai Madanpynriang ki la khur ïa ka jingjop ha ka jingïakhun quarter final kaba la long ha madan Artificial Turf kaba don ha Diengshynrum, Khliehriat ha ka sngi Thohdieng.
Lyngba kane ka nam jop bad jinglah ban ialehkai bha ha kane aïom, ka Khliehmyntriang bad ka Rymbai Madanpynriang ki la kiew sha ka kyrdan Second Division ha kaba kin ïoh ban ïalehkai naduh ka aïom ka ban wan.
Haba phai sha ka jingïakhun kaba nyngkong, ka Khliehmyn-triang SC ka la pynjem khnap ïa ka Pynthorsale SC haduh shiteng dorjon (6-0 kol). U Bring Dkhar u la khyrwit ïa ka hat-trick hadien ba u la ïoh ban thep ha ka minit kaba 38, 45 bad 71. Katba ïa kiwei pat la thep da u Raplangki Lyngdoh ha ka minit kaba 35 bad ïa ki ar kol da u Dao-shwa Siangshai ha ka minit kaba 63 & 67.
Ha kawei pat ka jingïakhun quarter final kaba bud, ka Rymbai Madanpynriang ka la pynliem noh ïa ka TSC Lummyrli da 1-0 kol. Ïa kane ka kol la thep da u Donaldo Dkhar ha ka minit kaba 15.
Ka jingïakhun semi-final jong ka lympung ïalehkai 3rd Division kan long haka 19 tarik hapdeng ka Moosianglamare Old pyrshah ïa ka Khliehmyntriang SC ha ka por 12 mynsngi, katba ka Moosianglamare New ïa ka Rymbai Madanpynriang SC ha ka por 2:30 nohphai sngi.
