Saipung, Nailur 15
Ka lympung ïalehkai 1st Division Foot-ball Tournament ba la pynïaid da ka Sai-pung Block Sports Association (SBSA) ka la sdang ha madan ïalehkai ka Lymyrsiang ha ka sngi Thohdieng.
Ha kane ka lympung la wan ïashim bynta da 16 tylli ki kynhun ba la bynta ha ki Group A, B, C bad D.
Ha ka ‘Group A’ ki long ka Mookhain SC, Lelad SC, Larket SC bad Pyrdung Moochut SC. Ha ka ‘Group B’ ka Risingstar FC, Sohïong SC, Pala SC bad Daistong SC. Ha ka ‘Group C’ ka Thuruk SC, Khaidong SC, Shnongrim B bad Mulait Brisumer SC. Ha ka ‘Group D’, ka United Biated, Tongseng SAC, Evanylla FC bad Lumshashram SC.
Ha kane ka lympung, ar tylli ki kynhun ki ban wan ha ka kyrdan ba hakhlieh na kitei ki group kin ïoh rung sha ka Knock Out Stage bad kawei ka kynhun na ka group ba duna poiñ duh kin shah pynhiar sha ka 2nd Division ha u snem ban wan. Ki kynhun kiba poi final baroh ar kin ïoh rung sha ka Super Division ha u snem ban wan.
Haba phai ha ka sngi sdang jong ka lympung, ka Risingstar FC bad ka Sohïong ki la ïakhaid da mar 2-2. Ïa ki kol jong ka Risingstar la thep da u Tolas Dkhar ha ka minit kaba 24 bad u Seiru Dkhar (46). Katba ïa ki kol jong ka Sohïong la thep da u Emerson Pala (46) bad kawei kaba la thep bakla da u rangïalehkai ka Risingstar ha ka minit kaba 70.
Ha ka jingïakhun kaba bud, ka Larket SC ka la pynliem ïa ka Mookhain SC da 2-1 kol. Ïa ki kol jong ka Larket la thep da u Soldis Dkhar ha ka minit kaba 27 bad 54, katna ïa ka shi kol jong ka Mookhain la thep da u Rajesh Dkhar (50).
Haka jingïakhun kaba khatduh, ka Pyrdung Moochut SC ka la pynliem ïa ka Lelad SC da 4-0 kol. Ïa kine la thep da u Kinson Bareh ha ka minit kaba 17, u Mit Bareh (27), Rahuh Bareh (47) bad u Vinson Chyrmang (68).
Ha ka 16 tarik ka jingïakhun kan long hapdeng ka Evanylla FC pyrshah ïa ka Tongseng SC ha ka por 10:30 mynstep, ka Thuruk SC ïa ka Khaidong SC por 12:15 mynsngi, katba ka Pala SC ïa ka Daistong SC ha ka por 2 baje janmiet.
