Itanagar, Nailur:
U lehnoh uba dei jong ka kynhun NSCN-IM u la shah pynïap ha ka jingïasiat bad ki shipai ïada ri ha Changlang distrik jong ka Arunachal Pradesh ha ka miet jong ka sngi Balang. Une u lehnoh u la shah pynïap ha ka jingïasiat kaba la jia ha Kali Mandir; ka thaiñ kaba hap hapoh ka jaka treikam jong ki pulit ka Miao ha Changlang distrik jong ka jylla Manipur, la ïathuh u Changlang Deputy Commissioner (DC) u Sunny Singh ha ka sngi Palei.
Une u lehnoh u la shah pynïap ha ka kynhun jong ki shipai ka 11 Assam Rifles ha ka jingïasiat kaba markylliang kaba la jia hadien ba arngut ki lehnoh ki la siat ïa ka kynhun jong ki shipai kaba la pynlong ïa ka jingpyntreikam kiba la thmu ban leit na Miao Ghat sha Dharampur lyngba ka Kali Mandir.
Haba la lap ïa ki lehnoh, ki shipai ka tnat Assam Rifles ki la pynibor pyrshah ïa ki. Ha kaba ïadei bad kane, ki lehnoh ki la siat da ka pistol 9 mm, bad uwei u kuli u la leit dei ïa kawei ka shaka kali jong ki shipai ïada, la ong u DC. “Haba la pynphai kylla ïa ka jingsiat da ka kynhun 11 Assam Rifles, u lehnoh u la shah siat bad u la ïap hashen katba uwei pat u la lait phet namar ka jingdum jong ka miet,” la ong u Singh.
Kumba la ïoh hukum, u DC u la hukum ïa u Extra Assistant Commissioner (EAC) u A. J. Lungphi ba un pynlong ïa ka jingtohkit ha kaba ïadei bad ka jingjia kumba long ki kyndon ba la buh da ka National Human Rights Commission (NHRC) lada jia ba ka jingïap ka dei na ka jingpyntreikam jong ki shipai ïada bad ïa ka kaiphot yn sa hap ban phah hapoh ki saw taïew.
