Lumding, Nailur:
Ka kynhun jong ki nongtuh kiba donkti ha kiba bun ki kam beaiñ ki la shahkem ha ki shipai ïada ri.
Ki shipai ïada ri kiba kynthup ïa ki briew kiba na ka kynhun CIB jong ka Railway Protection Force ki la kem ïa ki runar kiba don baroh 6 ngut.
Kane ka kynhun jong kine ki runar ka la donkti ha ka ban tuh ïa ki tiar jong ki nongleit jingleit ka la shah bat noh ha ki pulit jong ka tnat Railway.
Kine ki runar ha kane ka kynhun, ki la donkti ha ka ban knieh bad tuh ïa ki Mobile Phone, ka pisa bad kiwei pat ki tiar na ki briew kiba ju leit jingleit da ki rel.
Ka kynhun jong ki pulit, ka la ïoh ban kurup ïa 6 tylli ki Mobile Phone, ka pisa kaba la kot sha ka T. 10725 bad u drok ba la suba ba u dei u Brown Sugar uba la kot sha ka T. 9 lak na kine ki runar.
Ki pulit ki la pynithuh ruh ïa kine ki runar kiba la shahkem, ha kaba ki la ïathuh bniah ba ïa kine la tip kyrteng kum u Rafik Uddin, Azijul Haque, Abdul Wahid, Anuwar Hussain bad u Rajib Hussain na Hojai bad u Mahidul Islam na Nagaon.
Ïa u Mahidul Islam la tip ba u la dei u snar nongïalam jong kane ka kynhun.
Kumba la ïathuh, la ong ba kane ka kynhun jong ki shipai ïada, ka la ïoh ba kem shuh sa ïa kumba 9 ngut ki nongtuh ha ka por ba la pynlong ïa ka jingleit thwet bad khynra ha kine ki khyndiat sngi ba la leit.
Ha kaba ïadei bad kane, ki pulit ka tnat Railway ki la pynlong ïa ka jingtohkit kaba bniah ïa kine ki runar kiba la shahkem.
Ki pulit ki dang pynlong ïa ka jingleit thwet kaba jur ban ïohkem shuh shuh ïa kiwei pat ki runar khnang ban lah ban wanrah jingshngaiñ ha ka jaka sangeh rel bad ban buh jingshngaiñ ruh ha kiba bun ki shnong na ka bynta ka jingbha bad ka jingshngaiñ jong baroh ki nongleit nongwan.
