Chandigarh, Nailur:
U MLA jong ka seng Congress u Mamman Khan u la shahkem ha kaba ïadei bad ka jingdonkti ha ka jingïakynad kaba la jia ha ka 31 tarik, Naitung ha Nuh, la ïathuh ki pulit ha ka sngi Thohdieng.
Une MLA jong ka Ferozepur Jhirka, ïa uba la paw kyrteng ha ka ejahar kum uba la shah kynnoh donkti ha ka jingjia ïa kaba la buh hadien ba la dep ban jia ki jingïakynad, u la shahkem ha ka miet jong ka sngi Palei.
U Satish Kumar, uba long u Deputy Superintendent of Police jong ka Ferozepur Jhirkha bad u heh jong ka kynhun Special Investigation Team u la pynlong ïa ka jingtohkit ha kaba ïadei bad ka jingjia, u la pynshisha halor kane ka jingkem. U MLA ka Congress uba dei hi na Nuh u Aftab Ahmed u la pynshisha halor ka jingshahkem jong u Khan.
“Ki pulit ki la ai jingtip sha ngi bad u la shahkem,” la ong u Deputy Leader of the Congress Legislature Party ha Haryana Assembly. Kumba la ïathuh ka tyllong khubor, la ong ba ki shipai ïada ri ki la pynkhlaiñ ïa ka jingpahara hapoh bad ha ki bynta ba shabar jong ka ïingbishar kaba ha Nuh ha kaba la thmu ban ïalam ïa u Khan.
