Shillong, Nailur 15
Ar ngut ki ‘thei ïalehkai na ka shlem ai jinghikai ka Lah Bet Football Club ki la shah jied ban mihkhmat ïa ka Saiden Secondary School ha ka kyrdan ïalehkai U-17 (girls) jong ka 62nd Subroto Cup Football Tournament 2023 ka ban long ha nongbah Delhi.
Kine ki kynthup ïa ka Diamon Makroh bad ka Shimtilang Thongni.
Kane ka kyrdan ïalehkai jong ki kynthei kan sdang naduh 19 haduh 26 tarik mynta u bnai. Kumta katei ka kynhun kaba na Nongpoh, Ribhoi District, ka la don ha ka Pool-G ha kaba kan ïakhun pyrshah ïa ka kynhun na Goa, Uttarakhand bad ka Kendriya Vidyalaya Sangathan. Ka jingïakhun kaba nyngkong kan dei ha ka 20 tarik pyrshah ïa ka Goa.
Halor kane ka jingleit ïashim bynta na ka liang ka Lah Bet Football Club ka la ai khublei kitbok ïa kitei ki ‘thei ïalehkai lem bad ka kynhun hi baroh kawei ba kin lah ha ka ban ïalehkai bha khnang ba ki lah ban pynurlong ïa ka jingjop.
