Shillong, Nailur 17
Ka India ka la ïoh ban rah biang ïa ka nam lahduh jong ka lympung Asia Cup 2023 hadien ba ka la lah ban pynliem noh ïa ka Sri Lanka da 10 wiket ha ka jingïalehkai final kaba la long ha R Premadasa Stadium ha Colombo ha ka Sngi U Blei.
Kane ka jingïoh rah jong ka India ïa ka nam lahduh ka la long ruh lyngba ka jinglah ban kawang bol bha jong u Moham-med Siraj, uba la khur marwei haduh 6 wiket na ki 7 tylli ki over kiba u la kawang bad ai tang 21 run.
Haba phai sha ka jing-ïalehkai ka Sri Lanka kaba la tied nyngkong ka la lah ban kamai tang 50 run na ki 15.2 over bad ban hap lut baroh ki wiket. Haba ka India ka la hiar sha madan ban wan beh ïa kane ka thong kaba rit, ka la lah ban pyndep da kaba ïoh 51 run tang na ki 6.1 over khlem da hap wiket satia.
Ha kane ka lympung, u Mohammed Siraj u la ïoh khur ïa ka khusnam ‘Player of the Match’ hadien ka jinglah ban kawang bol bha jong u ha ka final bad ïa ka nam ‘Player of the Series la ïoh khur da u Kuldeep Yadav.
Kane ka jingjop bad rah nam lahduh, kan dei ruh kaba phra sien kynthih na ka bynta ka India ban rah ïa ka Asia Cup.
