Chennai, Nailur:
Kum shi bynta ban buh jingshngaiñ ha kaba ïadei bad ki jingtwa ne kiwei pat ki jingshah ktah kiba lah ban mih na ka jingtih pathar ïa ki marpoh khyndew ha ki bynta jong ka Cauvery, u Myntri Rangbah jong ka Tamil Nadu u M.K. Stalin kumba u la dep ban buh ka jingkular hapoh State Assembly u la ïai ban da kaba ong ba ka sorkar jylla kan ïai bteng ban pyrkhing ha kaba yn ym ailad ïa ka jingtih ïa ki mar poh khyndew ha ki thaiñ ba don harud jong ka wah Cauvery.
Kum ka jingai jubab halor ka jingbuh jingkylli da ki dkhot ba bun jong ki seng saiñ pyrthei, kynthup u MLA jong ka seng CML u T.R.B.Raaja, u la ong ba ha kano ka rukom ki dkhot hapoh ka ïingdorbar ki la lyngngoh haba ïohsngew ba ka sorkar kmie ka la jied ïa ki lai tylli ki Block ha Tamil Nadu na ka bynta ban buh ïa ka jaka ban die ïa ki mar poh khyndew ha ki distrik kiba don harud jong ka wah Cauvery, ma u ruh u la kyndit haba u la ïoh jingtip halor kane.
U la ong ba shen yn sa bishar bniah halor kane, hashwa kane u la dep ban phah da ka jingthoh sha u Myntri Rangbahduh u Narendra Modi ha kaba la buh ka jingkyrpad ïa u ba u la dei ban weng noh ïa kitei ki lai tylli ki Block ha Tamil Nadu ba la thmu ban buh bad die ïa ki marpoh khyndew.
U la ong ba u la phah ïa ki kopi sha u nongïalam jong ka seng DMK ha Parliament u T.R. Baalubad bthah ïa u ba u la dei ban aiti ïa ka sha u Myntri ka sorkar kmie uba dei khmih bad ban buh jingthoh ha kaba ïadei bad ka jingpyrshah jong ka jylla halor kane.
Kane ka jingpyntreikam pyrkhing ka long shi bynta ban ym ktah ïa ki thaiñ kiba don harud wah hadien habud khamtam ban ïada na ki jingshlei um jong kiba bun ki shnong ba marjan namar ka jinglah ban shna lynti jong ka um bad ki jingtwa khyndew.
