Shillong, Nailur 17
Ka lympung ïalehkai phutbol ba la pynïaid da ka Tyrsad Area Sports Association (TASA) ha madan Tyrsad, kata ha ki kyrdan bapher bapher ka la ïaid shaid shaid shakhmat.
Haba phai sha ki jingïalehkai ba la pynlong ha ka sngi Saitjaiñ, kata ha ka First Division, ka jingïakhun hapdeng ka Bara Football Club pyrshah ïa ka Pomsanngut Sports Club ka la kut noh ha ka jingïakhaid da mar shi kol. Ïa ka kol jong ka Bara FC la ïoh ban khyrwit da u Ricky Jaba ha ka minit ba 11 bad ïa ka kol jong ka Pomsanngut pat la ïoh ban thep da u Shlurbor Kharshillot ha ka minit ba 48.
Ha kane ka jingïakhun, u rangïa-lehkai ka Bara FC u Wanpynbiang Jaba u la shah beh noh madan hadien ba u la ïoh pdiang da ka ‘Red Card’ ha ka minit kaba 70.
Haba phai sha ka jingïalehkai jong ka kyrdan Second Division, ka Perkseh Sports Club ka la lah ban pynliem noh ïa ka Madan Mawser Sports Club da 4-1 kol bad ïa ki kol jong ka Perkseh la ïoh ban khyrwit da u Kobinstar Nongbet ha ka minit kaba 6, 21 bad 24 bad u Biangdor Rynjah ha ka minit kaba 34, katba ïa ka shi kol jong ka Madan Mawser la thep da u Hamebansan Jyrwa ha ka minit ba 34.
Ha ka jingïalehkai ha ka Third Division pat, ka Mawkynroh Football Club ka la lah ban pynliem noh ïa ka Nonglwai Sports Club da 3-0 kol bad ïa kine ki kol la ïoh ban khyrwit da u Tyngshainbor Khar-bani ha ka minit ba 1, u Bankmen Nongsiej ha ka minit ba 17 bad u Disparlin Lyngkhoi ha ka minit kaba 44.
Ki jingïalehkai ban wan jong kane ka lympung, kin long ne bteng biang pat ha ka 19 tarik mynta u bnai, kata ka jingïakhun ha ka Third Division kan long hapdeng ka Wahrisain Sports Club pyrshah ïa ka Wahumlawbah Sports Club ha ka por 12 baje mynsngi, ka Nong-madan Sports Club pyrshah ïa ka Lawkhla Mawlong Sports Club ha ka por 1.30 mynsngi bad ka jingïakhun ha ka First Division pat kan long hapdeng ka Umkaber Sports Club pyrshah ïa ka Kyrphei Sports Club ha ka por 3 baje janmiet.
