Chandigarh, Nailur:
Kumba la thmu da ki bor sorkar, la ong ba na ka jingjur jong ki kam khaïi drok ha ka jylla Haryana ha kaba ka la buh jingeh ïa ki pulit ba kin buddien ïa ki runar kiba la donkti ha kum kine ki jait kam, la pynlong noh da ka Seminar ha ka jylla na ka bynta ban ai jinghikai pyntbit ïa ki heh sorkar bad ïa ki nongtrei jong kiba bun ki tnat kumno ban lah ban buddien bad khmih bniah ha kaba ïadei bad ka jingkhaïi ïa ki jingdih pynbuaid bad ban pyntikna ha ka ban lah ban pyntreikam kham stet ha baroh ki liang na ka bynta ban buh jingthoh halor kum kine ki jingjia lada lap.
U Chief Secretary Sanjeev Kaushal uba la dep ban pynlong ïa ka jingïalang ha Haryana State Narcotics Control Bureau u la ong ba ka jingïashim bynta jong ki tnat pulit, ka koit ka khiah, Social Justice and Empowerment Department ka la buh jingkyrmen ban lah ban ïakhun pyrshah ïa u drok.
Nangne shakhmat, na kane ka jingai jinghikai baroh ki tnat treikam kin lah ban pynïaid shakhmat ha kaba ïadei bad ki jingpyntreikam jong ki ban lah ban ïakhun pyrshah ïa ki nongkhaïi drok.
Hashwa la pynpaw ba ka jingpyntreikam ïa ka Forensic Science Laboratory (FSL) ka la dei ban don khnang ba ka jingtohkit halor ki jingjia kan ïaid sted.
U Kaushal u la hukum ruh ïa ki heh sorkar ba ka State Drug Controller ka la dei ban pyrkhing bha ha kaba ïadei bad ka jingdon jong ka jingshalan bad ka jingpyndonkam ïa ki jait dawai bad kiwei pat ki jingpyndonkam na ka bynta ban shna dawai ha ka jylla.
La dei ban buh ruh la kajong ki kynhun pyntreikam ban khmih bniah na ka bynta kane.
Nalor kane, ka la dei ban don ruh ka Portal ha kaba ki kynhun ba buddien halor kum kine ki jingjia kin ïohlad ban kyntiew bad buh jingkynmaw ïa ki kaiphot jong ki. Kumba la bthah, la ong ba kine ki kynhun ki la dei ban nang pynthymmai ha kaba ïadei bad ki jingai jingtip bad ki rai ba la shim na kum kine ki jingïalang ba la dep ban pynlong.
Ka jinglah ban rat dyngkhong ïa u drok na ka imlang ka sahlang kan long da ka jingïatreilang jong baroh.
