New Delhi, Nailur:
Kumba la ïathuh ki kynhun wad bniah lyngba ka tyllong khubor la ong,”Ha ki khyndiat bnai ba la leit, ïa uwei u lehnoh la phah sha Punjab ha kaba la pyndonkam da ka Drone ban rah bad pynhap ïa u. Utei lehnoh ba la shahkem u la phla ba la phah ïa u da ki heh nongïalam jong ka kynhun Lashkar-e-Taiba (LeT) bad ki la siew ruh ïa u da ka pisa. U la shah bthah ba u la dei ban sah ha Punjab ha kaba la bhah ïa ka kam kaba u dei ban leh.”
Katkum ba la paw ha ka Video ba la ring hapoh ka ktem ai jinghikai jong ki lehnoh LeT kaba ha Shakargarh Pakistan, ka la pyni ba ki lehnoh ki la pyrshang ban pynrah da ki Drone ïa u briew bad pynhap ïa u ha ka um.
Ka kynhun lehnoh Lashkar-e-Taiba (LeT) kaba ha Pakistan ka la pynhap ïa u lehnoh ha Punjab da kaba pyndonkam da ka Drone, la ïathuh ki kynhun wad bniah ha ki lad phah khubor. Ka tyllong khubor ka la ïathuh shuh shuh ba ki lehnoh ki la pyrshang ban pynhap ïa ki lehnoh sha ki bynta jong ka ri India lyngba ki Drone kiba lah ban rah ïa u briew uba khia da kumba 70 kilo.
“Ha ki khyndiat bnai ba la lah, u lehnoh u la shah phah sha Punjab da kaba pyndonkam da ka Drone,” la ong ka tyllong khubor.
“U la phla ba u la shah phah ha ki heh ka kynhun lehnoh LeT bad ïoh ruh da ka pisa. U la shah bthah ba u hap ban shah pynsdien ha ka Drone bad ban sah ha Punjab ha kaba u la hap ban pyndep ïa ki kam ba la bhah na ka bybnta jong u,” la bynrap ka tyllong khubor.
Shuh shuh ka tyllong khubor, ka la ïathuh ba une u lehnoh u la shah bthah ba u la dei ban leit lum ïa ki tiar siat bad kiwei pat ki kuli ïasiat na ki jaka ba la shna bad pynmih ïa ki kiba don ha Punjab.
Kumba la sakhi, la ong ba ki kynhun lehnoh bad ki nongkhaïi drok kiba ha Pakistan ki ju pyndonkam da ki Drone na ka bynta ban pynpoi ïa ki tiar siat bad ki jingdih pynbuaid ha ki bynta jong ka ri India khamtam ha ki bynta jong ka Punjab bad Jammu & Kashmir (J&K).
Na ka liang ki kynhun shipai ïada ri ki la ïaleh katba lah ban khanglad kum ïa kine ki kam pyntriem jong ki lehnoh halor ka jingthmu ban pynhap ïa ki dkhot jong ki kynhun lehnoh lyngba ki Drone ha ki bynta khappud jong ka ri.
Kumba la ong ki heh ba dei khmih halor kane ka bynta, ki la ong ba kane ka sienjam jong ki lehnoh ka long kaba buh jingma shibun ha kaba ïadei bad ka jingshngaiñ jong ka ri naba lada ïa ki lehnoh ha kano kano ka por ba la pynhap ïa ki khlem pep da kaba suk kin ïoh ban phet bad buhrieh ïalade na ki bor pahara.
