Jowai, Nailur 17
Ka Mooknor Thadmuthlong Sports Club ka la rung sha ka jingïakhun semi-final hadien ba ka la lah ban pynliem noh ïa ka Lumpariat Sports Club ha ka jingïakhun quarter final jong ka lympung ïalehkai 2nd Division Football Tournamnet-6th Debo Shullai Memorial Trophy.
Ïa kane ka lympung ïalehkai la pynïaid da ka West Jaiñtia District Sports Association ha madan Kiang Nangbah Stadium Ladthadlaboh Jowai ha ka sngi Saitjaiñ.
Haba phai sha ka jingïakhun, ka Mooknor Thadmuthlong SC ka la pynliem noh ïa ka Lumpariat SC da 5-3 kol kaba la wan lyngba ka jingïashut tie breaker hadien ba ka jingïakhun ka la wai noh ha ka jingïakhaid da mar 3 kol.
Ki kynhun kiba la rung sha ka jingïakhun semi-final ki long ka Lion Sports Club, ka Shangpung Khliehmuchut Sports Club, ka Chutwakhu Sports Club bad ka Mooknor Thadmuthlong.
Ïa ka jingïakhun semi-final la thmu ban pynlong ha ka 18 tarik bad 19 tarik jong une u bnai hynrei namar ba ka dei ka sngi Anniversary jong ka Balang Unitarian ha ka 18 tarik bad ruh kan don ka Clinic jong ki Referee ha ka 19 tarik kumta ïa ka semi-final la hap ban pynpep shwa bad ïa ka tarik yn sa pynbna hadien.
Haba phai pat sha ka lympung ïalehkai (L) Kesilroy Pala Invitation Football Tournament jong ka Second Round kaba khatduh, ka Ialong Football Club ka la pynliem noh ïa ka Nangbah Iawmusiang Football Club da 2-1 kol.
Ïa ki kol jong ka Ialong FC la thep da u Roikhih Ningtdu ha ka minit ba 43 bad u Daruhi Pale ha ka minit kaba 90 katba ïa ka kol jong ka Nangbah Iawmusiang FC la thep da u Tiplang Rasmut ha ka minit ba 10.
Ka jingïakhun quarter final kan long ha ka 20 tarik haduh 23 tarik jong une u bnai ha ka por 2.00 baje nohphai sngi.
Ha ka 20 tarik, ka jingïakhun quarter final kaba nyngkong kan long hapdeng ka 7 Wasa United pyrshah ïa ka Dieñshynrum CSA United. Ha ka 21 tarik ka Rymbai Shkenshynriah Football Club pyrshah ïa ka Mihmyntdu Football Club bad ha ka 22 tarik pat ka Mukhla Football Club pyrshah ïa ka Ialong Football Club bad ka Mynsngat Football Club pyrshah ïa ka Salaroh Football Club.
