Khliehriat, Nailur 17
Ka Diengshynrum Sports Club bad ka Iatyllilang Hingaria Sports Club ki la rung sha ka final jong ka lympung 2nd Division Football Tournament ïa kaba la pynïaid da ka East Jaiñtia Hills District Football Association (EJHDFA).
Kane ka la wan hadien ba kine ki ar kynhun ki la jop ha ka jingïakhun semi-final kaba long ha madan artificial turf ha Diengshynrum ha ka sngi Saitjaiñ.
Ka Diengshynrum ka la lah ban pynliem noh da 1-0 kol ïa ka Pamrakmai Sports Club bad ïa kane ka shi kol la ïoh ban khyrwit da u Bewithus Sympli ha ka minit ba 71.
Ha kawei pat ka jingïalehkai, ka Hingaria ka la jop da 2-1 kol ïa ka Jalyiah United. Ïa ki kol jong ka Hingaria la ïoh ban thep da u Zinedan Lamin ha ka minit kaba 16 kaba mih paw ha ka dur ka penalty tang hapoh 16 minit ba la ïaid ka jingïakhun jong ka kylla step. Tang hadien katto katne por, ka Jalyiah ka la tam kylla ïa ka jingïakhun sha kaba ïakhaid da ka kol kaba la thep da u Tanlang Dkhar ha ka minit ba 26.
Da kane ka jingïakhaid ka jingïalehkai ka la shongshit bad kine ki ar liang mamla ki la tynjuh bor ban ïoh thep kol. Pynban ka la shimpor haduh ka minit kaba 64 ïa ka Hingaria ban ïoh pyntam da shi kol kaba la neh haduh ba la kut ka por. Ïa kane ka kol la thep da u Dikon Lapasam.
Kumta na kane ka namjop, kine arliang mynta kin pynkhreh ban mih madan ban ïaknieh ïa ka nam lahduh jong kane ka aiom ha ka 23 tarik Nailur ha ka por 2:30 mynsngi.
