Lucknow, Nailur:
U Myntri Rangbah jong ka Uttar Pradesh u Yogi Adityanath ha ka Sngi U Blei u la ong ba lada don kino kino ki briew kiba leh kam sniew kum ha ka ban thombor ïa ki kynthei ha ka jylla, ka ‘Yamraj’ ne ka jingshah bishar kan ap na ka bynta jong ki.
Kane ka jingkren jong u Myntri Rangbah ka la long hadien ba kawei ka khynnah skul ka la duhnoh ïa la ka jong ka jingim haba ki runar kiba la shong ha ki ar tylli ki kali ar shaka ki la tan ïa ka na ka ‘dupatta’ ne ka jaiñ tawah ryndang halor ka jingthmu jong ki ban jrongkti bad leh kynshleiñ ïa ka ha kaba ka la hap na ka Bicycle ba ka shong bad shah ïuh ha kawei pat ka kali ar shaka kaba bud nadien ha Ambedkarnagar.
Kane ka jingjia ka la jia ha ka sngi Thohdieng ha kaba la ong ba ki lai ngut kiba la shah kynnoh donkti ha ka jingjia ki la shahkem ha ka miet jong ka sngi Saitjaiñ.
Ki pulit ki la pynshisha da kaba ong ba arngut na kine ki runar ki la mynsaw na ka jingdei kuli katba uwei pat u la mynsaw ka kjat naba ki la pyrshang ban phet na kti jong ki pulit ha ka sngi U Blei.
Ha kaba ïadei bad kane ka jingjia kumba la paw ha ka CCTV, la ong ba kane ka khynnah kaba pule ha ka klas 11 bad kawei pat ka khynah la ïohi ba ki la ñiah da ki Bicycle ha ka por ba ka kali arshaka kaba la pynher sted bha ka la bud nadien jong ka bad u briew uba shong nadien u nongñiah u la tan ïa ka Dupatta haba ki la poi hajan jong ka.
Kane ka khynnah ha kane ka por ka la hap ha madan naba kam lah tehlakam shuh bad ka la shah ïuh ha kawei pat ka kali arshaka kaba bud hi nadien jong ka.
Ki runar kiba la shahkem ha kane ka jingjia ki dei kiba la tip kyrteng kum u Sehbaz bad u para jong u u Arbaz, uba la tan ïa ka Dupatta. Uwei pat uba la shah kynnoh ïa uba la tip kyrteng kum u Faisal, u dei uba la bud nadien kane ka khynnah.
Haduh ba la thoh ïa ka khubor ym pat tip bniah, la kine ki arngut shi para ki don ka jingïadei kam ne em bad u Faisal, la ïathuh ki heh pulit.
U Superintendent of Police jong ka Ambedkarnagar u Ajit Sinha ha ka jingïakren bad ki nongthoh khubor ha ka sngi U Blei u la ong,
“Ïa kine ki lai ngut kiba la shah kynnoh la rah sha ka jaka ai jingsumar na ka bynta ban phah khmih bniah bad phah sumar ha ka sngi U Blei. Kine ki lai ngut ki la kynthih na ka kali jong ki pulit, ha kaba ki la knieh ruh ïa ka suloi bad siat ïa ka kynhun jong ki pulit kaba thmu ban kthong ïa ki.”
