New Delhi, Nailur:
Ka Supreme Court hynnin ka sngi ka la kyntait ban khmih bniah halor ka jingkyrpad jong u Myntri Rangbah jong ka Jharkhand u Hemant Soren pyrshah halor ka jingkhot hajir jong ka kynhun Enforcement Directorate’s (ED) ha kaba ïadei bad ka jingshah kynnoh donkti ha ka jingkamai ïa ka spah bymhok.
Ka kynhun nongbishar jong u Justice Aniruddha Bose bad u Justice Bela M Trivedi ka la tyrwa ïa u Soren ïa ka jinglaitluid ban leit mih sha Jharkhand High Court na ka bynta ban kham pynsting ha kaba ïadei bad kane ka bynta.
U Senior Advocate u Mukul Rohatgi u la pynshisha hakhmat ka ïingbishar ba kane ka jingjia ka long ban buddien halor ki jingjia kiba buh jingma ïa ka imlang ka sahlang. “Rohatgi, balei phim leit sha ka High Court? Em em, leit sha ka High Court. Ngin sa ai jingbit ïa phi ba phin weng ïa ka jingmudui,” la ong ka kynhun nongbishar.
Ïa kine kiei kiei baroh la ñiew ba la dep ban weng noh. U Additional Solicitor General S V Raju, uba la mihkhmat na ka bynta ka kynhun ED, u la ong ba ïa kane ka bynta la shah kynthup halor kiba bun ki jingbishar.
U Soren u la leit sha ka ïingbishar bahakhliehduh na ka bynta ban pynibor pyrshah halor ka jingshah khot hajir jong u bad ban leit mih hakhmat ka jaka treikam jong ka kynhun tohkit ha Ranchi ha ka 14 tarik, Nailar bad ban buh jingthoh ïa ka jingphla jong u hapoh ka jingtreikam jong ka Prevention of Money Laundering Act.
Hashwa, u Soren u la ïaid lait ha kaba ïadei bad ka jingkhot hajir jong ka kynhun ED ha kaba ïadei bad ka jingshah kynnoh donkti ha ka jingklop jaka.
U nongïalam jong ka seng Jharkhand Mukti Morcha u la shah tohkit da kumba palat 9 kynta ha ka kynhun ED ha ka 17 tarik, Naiwieng jong u snem ba la lah ha kaba ïadei bad ka jingshah kynnoh donkti jong u ha ka jingkamai spah beaiñ lyngba ka jingtih beaiñ ïa ki marpoh khyndew ha ka jylla.
