Shillong, Nailur 18
Ka kynhun ïalehkai phutbol ka ri India kan pynkhreh ïa ka jingïakhun kaba nyngkong pyrshah ïa ka China na ka bynta ka Asian Games ka ban long ha ka Sngi Ba-ar ha Hangzhou.
Kane ka jingïakhun jong ki shynrang kan kut haduh 7 tarik u Risaw, katba ïa ka jingïalehkai jong ki kynthei kan sdang naduh 21 tarik mynta u bnai haduh 6 tarik u Risaw.
Ha kane ka lympung kin don 23 tylli ki kynhun jong ki shynrang kiba la phiah ha san tylli ki group kiba don mar saw tylli ki kynhun bad tang kawei ka group kaba don lai tylli ki kynhun. Ka India ka la don ha ka Group-A, kaba kynthup lang ïa ka China, Bangladesh bad ka Myanmar.
Ki ar tylli ki kynhun na kawei pa kawei ka group bad kiwei pat ki ban wan ha ka kyrdan balai na baroh kitei ki group kin ïoh rung sha ka pre-quarter final.
Ka Republic of Korea ka dei ka kynhun kaba la bat khatduh ïa ka nam lahduh ha ka liang ki shynrang. Ka Iran ka la wan ba-ar hadien ba ka la khur saw tylli ki takma ksiar.
Na ka liang ka kynhun ïalehkai ka ri ka la mih ha ka sngi U Blei ban leit sha China ha kaba u ar ngut ki rangïalehkai ‘dien kata u Konsam Chinglensana Singh bad u Lalchung-nunga kim shym la leit lang bad ka kynhun na ka daw ba ki la ïakynduh jingeh ha kaba ïadei bad ka visa, hynrei na ka liang ki nongïalam ka IOA ki la ïathuh ba kine ki ar ngut kin sa leit ha kine ki ar sngi ki ban wan.
U Chinglensana bad u Lalchungnunga kim shym la don hapoh ka thup jong ki 50 ngut ki rangïalehkai kiba la phah da ka All India Football Federation (AIFF) na ka bynta ka Asian Games bad ki la ïoh jingbit sa tang 22 ngut ki rangïalehkai kiba la don hapoh ka kynhun.
U Chef de Mission jong ka ri na ka bynta ka Asian Games u Bhupin-der Singh Bajwa u la pynpaw ïa ka jingsngewkhuslai ba kine ki ar ngut ki lah ban duh ïashim bynta ha ka Asian Games. Kine ar ngut kin ym lah ban ïashim bynta na ka bynta ka jingïakhun kaba nyngkong pyrshah ïa ka China ka ban long ha ka Sngi Ba-ar.
“Ma nga bad u President ka AIFF u Kalyan Chaubey ngi la pyrshang ban pynïoh ïa ka visa na ka bynta kine ki ar ngut ha ryngkat ka shithi kaba ngi la phah sha ka tnat ïalehkai bad dei ban ïoh kloi ïa ka visa khnang ba ki lah ban ïasoh lang bad ka kynhun,” la ong u Bajwa.
“Kin leit sha China da ka express visa bad kin ïoh ïa ka jingbit ynda ki la poi shatei. Te kumta kan ym don jingeh eiei na ka bynta kitei ki ar ngut ki rangïalehkai,” u la bynrap.
Kham hashwa na ka liang u coch ka kynhun u Igor Stimac u la ong ba ka kynhun jong u kan ïakynduh ïa ka China ha ka sngi Ba-ar hadien ba la poi ha Games Village. Ka AIFF ka la lap ban pynkhreh da ka kynhun ba-ar (second) na ka daw ka jingbym pyllait da ki klob jong ka Indian Super League.
Ka India kan pynkhreh ruh ïa ka jingïakhun ba ar pyrshah ïa ka Bangladesh ha ka 21 tarik bad ïa ka Myanmar ha ka 24 tarik.
