New Delhi, Nailur:
U Myntri Rangbahduh u Narendra Modi ha ka Sngi U Blei u la pyllait ïa ka skhim ban pynbiang da ka ram, ka jingai jinghikai pyntbit bad ka jingkyrshan ha ka ban pynpoi ïew ïa ki mar na ka bynta ki kynhun kiba ïeng ha la ki jong ki kjat kiba kynthup ïa ki riewdonsap kiba ju shna jingshna da ki kti bad die pat ïa ki ha ki ïew.
Ha kaba ïadei bad kane ka jingpyntreikam ki nongïalam jong ka kynhun Other Backward Classes ki la ïaphiah.
Ki la don kumba katto katne ngut napdeng jong ki kiba la pdiang ïa ka jingtreikam jong ka PM Vishwakarma Scheme naba ka la long ka jingïarap kaba ap la kham slem hynrei ki la don kumba katto katne ngut kiwei pat kiba kyntiat ban pdiang ïa ki jingïoh jingmyntoi.
Kine baroh arliang, ha kaba ïadei bad kane, ki la pynpaw ba ki kynhun Scheduled Caste kim shah ñiew kum shi bynta ban shah kynthup ha ki Vishwakarma Caste.
Hapoh ka jingtreikam jong kane ka skhim, ki briew kiba don bynta ha ki 18 tylli ki jait kam khaïi ki lah ban shim ïa ka ram haduh T. 3 lak, da 5 per cent ka sut, na ka bynta ban ïoh ban die ne pynpoi ïew ïa ki tiar ba ki la dep ban shna.
Kine kin sa ïoh jingïarap ruh ha kaba ïadei bad ka jingpynmih ïew bad ai jinghikai pyntbit ha kum kine ki jait jingtrei.
U Modi u la ong ba kine ki nongïoh myntoi kin sa ïoh da ki tiar ban shna jingshna kiba kot sha ka T. 15,000.
Kine ki nongïoh myntoi ha kaba nyngkong kin sa ïoh ïa ka Loan kaba T. 1-lak. Hadien ba la dep ban siew, kin sa ïoh shuh sa kumba T. 2 lak.
