Shillong, Nailur 18
U MLA ka Pynthor Umkhrah, Bah A.L Hek ha ka Lah Sngi U Blei u la plie paidbah ïa ka madan Futsal kaba la tip kyrteng kum ka ‘Thrive Sports Arena’ ha Langkyrding Mihngi. Kane ka long shi bynta ban pynshlur ïa ki samla bad ïa baroh kiba ïeid ha ki kam ïalehkai.
Ha kane ka sngi la ïadon lang u Bah Allantry Dkhar, Vice President ka seng United Democratic Party (UDP), u MLA ka Mawkaiaw u Bah Nujorki Sungoh, u SP ka Easy Khasi Hills u Bah Sylvester Nongtnger, ki nongïalam shnong bad kiwei kiwei.
Haba ai jingkren ha kane ka sngi, u Bah Hek u la ai khublei ïa ka ïing ka sem jong u MLA ka Ranikor, Bah Pius Marweiñ kiba la ïohi jngai bad don ka mynsiem ban kyntiew ïa ka kam ïalehkai, namar lyngba kane ka jaka ïalehkai kin samla bad kiba ïeid ïa ki kam ïalehkai kin ïoh ka lad ban wan kilan met ha kane ka jaka.
U la bynrap ruh da kaba kyntu ïa ka ïing ka sem jong u Bah Pius ban dang pynbha shuh shuh da kaba buh ïa ka Swimming pool bad ka Gym khnang ba ki samla kin ïoh ban kilan met. U la ong ruh ba kum ki trai kim dei ban shuh aiei, hynrei ki dei ban shim da ka dor namar ban shu aiei kam long. “Phi lah ban shim da ka dor kaba rit bad ban dang pynitynnad shuh shuh ïa ka.”
Haba ïakren bad u Bah Pius Marweiñ u la ïathuh ba kum u samla uba sngewtynnad ban ïalehkai, u thrang ban pynlut por ha kane ka kam hynrei da ka jingbym don ki jaka ban ïalehkai ka pynlong ïa u bad ka ïing ka sem ban pyrkhat ban shna noh da kane ka madam ban ïoh ïalehkai bad da ka jingdon jong kane ka jaka u kyrmen ba kiwei ruh kin lah ban kilan met na ka bynta ka bha ka miat bad ka koit ka khiah jong ki.
