Shillong, Jylliew 05
Hadien shi snem duna, ka Shillong Lajong Football Club ka la ïakhlad lok noh bad u coach na Spain, Jose Carlos Rodriguez Hevia, la pynbna kane ka klob ha ka Sngi Palei.
“Ngi ai khublei shibun eh ïa u Jose na ka bynta ka jingaiti lut met bad mynsiem, ka jingpyrshang, bad ka jinglong nongïalam kum u coach. Ngi kitbok kitrwiang ïa u ba un nangjop ha baroh ki jingthmu jong u ha ka lawei ka ban wan,” la pynpaw kane ka klob ïalehkai ka nongbah.
U Hevia u la ïasoh ban shimti ïa kane ka klob kaba shim bynta ha ka lympung I-League ha u Naitung 2024. Kumta kane ka dei ka sien kaba ar ba u la wanphai biang sha kane ka klob naduh ba u la shimti kum u Technical Director naduh u snem 2019 haduh ka jingwan ka khlam Covid-19 ha u snem 2020.
Kham hadien ynda u Rodriguez Hevia u la shimti ïa ka kam kum u coach mynshem snem, u la ïalam ïa ka Lajong sha ka semi-final jong ka Durand Cup, ha kaba kane ka klob ka la ïoh ïa ka kabu ban ïalehkai ha kane ka nongbah haduh ba kan shah rem noh ha ka NorthEast United FC.
Hapdeng ka jingkhih mynsiem ki rangïalehkai kane ka kynhun, hynrei kam shym la lah ban rah sha ka kyrdan kham shakhmat ha ka I-League 2024-25. Wat la ka la long ka kynhun kaba khlem shah rem ha ki hynñiew sien ïakhun, hynrei ha kaba kut ka SLFC ka la wan ha ka kyrdan ba phra, kaba long kajuh ka kyrdan ha ka aïom ïalehkai 2023-24 ha ka por ka jingïalam u Bah Bobby L. Nongbet kum coach.
Ha ka por ba u don bad ka Lajong ha u snem 2019, kane ka klob kaba la shah pynhiar kyrdan noh na ka I-League, hynrei ka la wanphai da ka jingjop ïa ar tylli ki lympung ïalehkai kata ha ka Shillong Premier League bad Meghalaya State League hapoh ka jingïalam jong u Rodriguez Hevia. Ha ka samoi ba la dep, une u coach uba na Spain u la pynleit jingmut bha na ka bynta katei ka kynhun (senior) ha ka I-League, katba u Bah Nongbet u la shimti ban pynïaid ïa kane ka kynhun ha ka SPL bad MSL.
