Guwahati, Nailur:
Kum shi bynta ban ïoh ïa ka nam ha ka pyrthei ha kaba ïadei bad ka jinglah ban thung ïa 1 klur tylli ki tynrai dieng ha ka sngi U Blei ha ka jylla, u Myntri Rangbah u Himanta Biswa Sarma u la ong ba ka sorkar Assam kan sa ïakhun halor ka jingthmu ban thung ïa kumba 8 klur tylli ki tynrai dieng ha u snem ban wan bad sa kumba 10 klur tylli ki tynrai dieng ha u snem 2025.
U la ong ba ka ‘Amrit Brikshya Andolan’ kan sa nang pynbun shuh shuh ïa ki dieng bad ki jingthung bajyrngam khnang ban lah ban wanrah ïa ka ïoh ka kot ha kaba la thmu ban ïai thung ïa ki dieng kiba ai jingmyntoi ha kum kine ki jingpyntreikam.
“Mynta ngi la thmu ban thung da kumba 1 klur tylli ki tynrai dieng ha ka jylla bad ngi la khmih lynti ban lah ban thaw buit bad ban wanrah ïa ka nam ha ka pyrthei halor kane,” la ong u Sarma, ha ka por ba u la sdang ban plie ïa ka jingïalap ha State Secretariat ha ka step jong kane ka sngi.
U la ong ba ha u snem ban wan ka sorkar jylla kan sa pyrshang ban thung ïa kumba 3 klur tylli ki tynrai dieng ha ki thaiñ ki bym dei ki jaka khlaw bad sa kumba 5 klur ha ki jaka ba long khlaw, katba ha u snem 2025, ka jingthmu kan long ban thung sa kumba 5 klur tylli ki tynrai dieng ha kaba ïa uwei uwei na kine yn sa thung ha ki jaka bym long bad kiba long khlaw.
