Shillong, Nailur 18
U Shanborlang Marbaniang u la lah ban pynpaw ïa ka jingtbit ha ka rynsan ïakura ba la tip kum ka United Professional Boxing ba la pynong da ka Indian Boxing Council.
Une u rangïakura ka Jylla u la lah ban pynïakhaid (draw) pyrshah ïa u Adil Rajesh Kumar Singh uba na Maharashtra ha ka kyrdan ïakura jong ka Super Flyweight 52kg kaba la long ha ka Sngi Saitjaiñ ha ka nongbah Delhi.
U Adil Rajesh u dei u rangïakura uba la bat ïa ka kyrdan basaw hapoh India ha ka Bantamweight, katba u Shanborlang u dei uba bat ïa ka kyrdan ba nyngkong ha ka Super Flyweight.
Wat la ka jingïakhun ka la neh naduh ka wat kaba hynriew, pynban u Shanbor um shym la kynran dien ban pyni ïa ka sap ïalehkai naduh kaba sdang bad ruh ban pynshongbiej ïa ki paidbah nongpeitkai ha nongbah Delhi.
Dangshen ha ka sngi rakhe ïa ka laitluid ka ri India kaba 76 ha ka 15 tarik u Nailar mynta u snem, u Shanborlang u la lah ban pynliem ïa u Prasad Katnoor ha ka Super Fly Weight 52kg.
U Shanbor uba dei u khun jong ka Kong Siplinda Marbaniang ba shong ba sah ha Pdengshnong, Umlyngka kaba ha Upper Shillong,.
Kumba ka paw kane ka long ka sien ba san kaba u la kiew rynsan ha ka Professional Boxing naduh ba u la khur jingjop ha ka Marine Pro Boxing Promotion ha u snem 2022 kaba la long ha Mumbai, katba u la ïakhaid pat lai sien ha ka Professional Boxing kaba la long ha u snem 2022 bad 2023 ha Manipur.
Haba phai khyndiat sha ka jingïaid lynti utei u rangïakura uba dang 24 snem ka rta ha ka kam ïakura ka la ïaid mynta la 13 snem kynthih kata naduh u snem 2010, hynrei haduh mynta um shym la kynran dien namar ka jingangnud ka jong u ka long ban khur ïa ka nam lahduh ne ka Belt khnang ba kan long ka jingmyntoi ïa u ba un nangjam shaphrang ha ka kam ïakura.
Halor kane ka jinglah ban ïalehkai bha, na ka liang ka Meghalaya Professional Boxing Council kan pynkup burom ïa u Shanbor ha ka sngi ba-ar Upper Shillong Boxing Hall kaba ha Nongkseh rim.
