New Delhi, Nailur:
Ha ka jingpyntreikam kaba la pynsted bad kloi-lan bha ki shipai ka tnat Border Security Force (BSF) da ka jingjop ki la lah ban pynpulom ïa ka jingthmu khaïi ïa u drok ha ki bynta jong ka International Border ha Ferozepur Sector ha ka step jong ka Sngi U Blei.
Ha ryngkat ka jingïatreilang bad ki pulit jong ka Punjab, ki heh ka kynhun wad bniah ki la ïoh ban kurup ïa u jingdih pynbuaid uba don ka jingkhia kaba 2.5 kilograms.
Ha ka step jong ka 17 tarik, Nailur, kumba la antad ha ka por 4:10 mynstep, ki shipai BSF ki la ïohi ba don ka jingher jong ka Drone hajan ka shnong Gatti Rajoke ha Ferozepur distrik.
Na ka jingkhmih bniah ïa ki jingpyntreikam, ki shipai pahara ha ki bynta khappud ki la lap ïa ka Drone, ha kaba ki la siat ban pynhap ïa ka, la pynshisha u heh jong ka tnat shipai BSF.
Hadien ka jingkhmih bniah, ka kynhun kaba la pynlong ïa ka jingthwet bad khynra ka la ïoh ban kurup ïa ki jingdih pynbuaid ha ka por kumba 6:30 mynstep. Na ka song ba la ïoh ban kurup, la don u drok ha kaba ïa kane la lap na ki lyngkha ba don hajan kane ka shnong.
Kane ka jinglah pyntreikam jong ki shipai ha kane ka sien ha kaba ïadei bad ka jingpyntreikam ka la lah sa shisien pat ban ïakhun pyrshah ïa u jingdih pynbuaid, ha kaba kane ka long ka jingjop kaba khraw ha kaba ïadei bad ka jingïakhun pyrshah ïa ki jingsniew kiba mih na u drok.
Shuh shuh la ïathuh ba ka la long ka jingjop kaba khraw naba ka kynhun shipai BSF ka la ïoh ban pynjulor ïa ka Drone kaba la shna ha China ha Tarn Taran Sector ha ka janmiet jong ka 16 tarik, Nailur. Ïa kane ka Drone, la ithuh bad tip kum ka DJI Mavic-3 Classic, ha kaba la lap ïa ka na ki lyngkha hajan TJ Singh Village ha ka por ba la pynlong ïa ka jingkhynra bad jingpyntreikam kaba la long hapoh ka jingïatreilang jong ki shipai ka tnat BSF bad ki pulit jong ka Punjab.
