Shillong, Nailur 19
U Asst. Organising Secretary ka KSU Sengkmie u samla Hopefulborn L. Mawnai u la kyntu ïa ki khynnah ki samla ba kin pynlut ïa ka por ha ki kam kilanmet khnang ba kin lait na u drok, uba long u jingdih uba la pyntroiñ bad pynjot ïa ka jingim.
Utei u nongïalam bad uba bat ruh kum u Finance Secretary ka KSU Upper Shillong u la kren ïa kitei kyntien ha ka sngi pynkup burom ïa uwei na ki khlur ïakura ka Jylla u Shanborlang Marbaniang ha ka sngi Ba-ar.
Kane ka jingjyllei u drok ha kine ki sngi kiba mynta ka la pynkhuslai ïa kiba bun ki longïing longsem kiba don ïa la ki khun ki kti namar une u drok u la pynjot ïa kiba bun ki khun samla bad wanrah ka jingbym shongsuk ha ki longïing longsem, ki shnong ki thaw bad ruh ha ka imlang sahlang.
Wat la na ka liang ki bor sorkar, kumjuh ki kynhun sengbhalang, ki shnong ki thaw ki ïai ïaleh na ka por sha kapor ban rat dyngkhong ïa utei u jingdih, hynrei kaba sngewsih ka long ba katba nang mih ki sngi nang jyllei kiba khaïi tuh bad bun na ki khun samla ki ngop ha une u jingdih uba pynjot shi syndon ïa ka jingim jong ki.
“Ki jingsniew ba laiphew jait ki la sdang ban wan tyllep hapoh ka ri jong ngi. Ngi dap da ka jingsngew synei ïa ki kmie ki kpa jong kito ki longïing kiba mad ïa ki jingsngewsih ha kaba ki khun ki, ki ngop ha ki jingdih kiba laiphew jait kum u drok bad kiwei.”
“Nga kyntu ïa ki bor ba dei khmih jong ka Upper Shillong Boxing Hall ba kin pyndonkam ïa kane ka hall na ka bynta ki khynnah samla ha ka ban plie ïa ki ha kaba kilanmet khnang ba kin lait na ki jingdih kiba sniew.
Utei u nongïalam ka seng KSU u la pan ka jingkyrshan ruh ban ïasnohkti lang ha ka ban pynduh jait noh shi syndon ïa utei u jingdih uba sniew uba la pynjot ïa shibun ki khun samla.
