Shillong, Nailur 19
Ki lympung ïalehkai ba la pynïaid da ka Tyrsad Area Sports Association (TASA) ka la nangjam shaphrang ha ka sngi Ba-ar ha madan Tyrsad.
Ha ka jingïakhun jong ka First Division hapdeng ka Kyrphei SC pyrshah ïa ka Umkaber SC ym shym la don ba lah ban pynkhih jar haduh ban da kut ka jong ka jingïalehkai. Na ka liang ka Kyrphei ki la don ki khep ba ka ïoh ka kabu ban thep kol, hynrei kam shym la seisoh satia bad haduh kaba kut ki la shu hun noh ban ïasam mar shi point
Ha ka jingïakhun jong ka Third Division pat, ka Wahumlawbah SC ka la jop da 1-0 kol ïa ka Wahrisaiñ. Ïa kane ka kol la ïoh kum pynthep hi da u rangïalehkai ‘dien ka Wahrisaiñ ha ka minit kaba 30.
Haba phai sha kawei ka jingïakhun ka Thrd Division, ka Nongmadan ka la jop ïa ka Lawkhla Mawlong.
Kane ka lympung kan bteng biang ha ka 23 tarik mynta u bnai, ha kaba ka jingïakhun jong ka Third Division kan long hapdeng ka Laitlarem SC pyrshah ia ka Laitsohphlang SC ha ka por 12 baje mynsngi, kumjuh ha ka Second Division kan long hapdeng ka Phanniewlahrum SC ïa ka Pompyrthat SC ha ka por 1:30, katba ha ka First Division ka Mawlum Tyrsad SC kan ïakhun pyrshah ïa ka Rangshangkham SC ha ka por 3 baje janmiet.
