Nongpoh, Nailur:
Ka long ka khubor kaba ai mynsiem bad kaba sngewtynnad eh ban tip ba kawei na ki longkmie na Ri Bhoi wat hapdeng ka rta kaba la heh, kata 53 snem, hynrei lyngba ka jinglenlade bad jingminot thop, ka la lah ban pyndep ïa ka jingpule ha ka Bachelor of Arts (B.A) na Balawan College, Umsning kaba pynïasoh bad ka North Eastern Hill University.
Kane ka longkmie ka dei kaba la tip kyrteng kum ka Kong Lakyntiew Syiemlieh. Ka dei ruh kaba la paw ha kine ki khyndiat snem hadien ka jinglah ban pyndep ïa ka eksamin matrik hapdeng ka jingheh ka rta, ka jingbunkam ban peit ïa ka ïing ka sem, ki khun ki kti bad ruh ïa kam nonghikai.
Kum ka dak jong ka jingsngew sarong bad ka jingai mynsiem ban pynshlur ïa kiwei ruh ban bud ïa ki dienjat jong katei ka longkmie, na ka liang ka Khasi Students Union, North Khasi Hills District lyngba ka Education Cell ba la lamkhmat da u samla Banjop Maring, Chairman, ha ka sngi Palei ka la leit ban pynkup burom kyrpang ïa katei ka longkmie ha ïingsah jong ka, kaba don ha Lum Umpih, Umsning.
Ka jingthmu ba kongsan jong ka jingleit pynkup burom ka seng, ka dei ban pynpaw sha ka pyrthei ba ka jingduk jingkyrduh, ki jingeh kiba ban ha ka jingim, kim lah satia ban khanglad ban poi sha ka thong khamtam ha kaba ïadei bad ka pule puthi, ka dei kawei na ki atiar kaba kordor tam ha kane ka juk kaba mynta.
Ka KSU ka la pynkup burom kyrpang ïa ka Kong Lakyntiew Syiemlieh da ka jaiñ ryndia, ka pisa bad ka memento kum ka dak ban pynpaw ïa ka jingsngew sarong halor ka jinglah jong ka ban pyndep ïa ka jingpule hapdeng ki jingeh kiba bun kiba long pat ka nuksa kaba shai na ka bynta kiwei pat ha ka imlang ka sahlang.
Kum ban shu pynkynmaw khyndiat, ka Kong Lakyntiew Syiemlieh, ka dei ka nonghikai ha ka skul Persara Upper Primary School, Lum Umpih bad ka dei kaba la don saw ngut ki khun bad ar ngut ki khun ksiew. Kaei kaba sngewtynnad shaphang kane ka longkmie, ka long ba wat hapdeng ka jingbun kam ban peit ka ïing ka sem, ban peit ïa ki khun ki kti bad ruh ha ka kam hikai, hynrei ka jinglah jong kane ka longkmie ban bate ïa ka por bad ban ïai minot thop, ka la pynlong ïa ka ban lah ban pyndep ïa kane ka kyrdan pule, kaba lehse kham niar eh kin don kiba lah.
Haba ïoh ban ïakren, ka Kong Lakyntiew ka la ïathuh ba hadien ka jingpyndep ïa ka eskamin matrik, ha ka klas kaba khadwei, lane kata ka klass 11, ka la shu leit thoh tang ha ka por eksamin hynrei ynda la poi ha ka kyrdan kaba khadar lane ka 12, ka hap phah bujli noh ïa kam hikai bad ban leit klas thikna manla ka sngi, naba katei ka la kham eh ban shu leit thoh tang ïa ka eksamin.
Ka la ïathuh ba na ka liang ki khun ki kti ki jongka, ki ailad beit ïa ka ba kan pyndep ïa katei ka jingpule kumba kala angnud naba ki tip ba kaei kaba ka leh ka dei kaba bha bad kumta kane ka la nang ai mynsiem bad pynshlur shuh shuh ïa ka tad haduh ba kan da lah ban pyndep wat ïa ka kyrdan degree ha ka Bachelor of Arts.
Kum ka jingsngewnguh halor ka jingkynmaw kyrpang jong ka KSU ban pynkup burom, ka Kong Lakyntiew ka la pynpaw ïa ka jingsngewnguh kaba khraw bad kyrmen skhem ba ka seng kan ïai leh ïa kine ki kam kiba bha na ka bynta ka imlang ka sahlang. Ha kajuh ka por, ka buh ruh ïa ka jingkyntu sha ka seng ba kan peit kyrpang ïa ki khun samla kiba duk ba kyrduk bad kiba shem jingeh wat lada ki dei kiba stad eh, hynrei na ka daw jong ka jingbym don ka lad, kim banse ban pynkut noh ïa jingpule.
