Shillong, Naitung 09
Ka Myntri ka tnad pla tyngka bad Corporate Affairs ka Sorkar Pdeng, ka Nirmala Sitharaman kan sa wan jngoh ïa ka Jylla na bynta 4 sngi, kata naduh ka 10 tarik haduh ka 13 tarik Naitung, 2025.
Kane ka jingwan jngoh kan sa sdang naduh ka 10 tarik Naitung da ka jingplie ïa ka Polo Shopping Complex, bud sa ka jingïakren hapoh ka Project Monitoring Information System (PMIS) ha Shillong.
Ha ka 11 tarik, ka Myntri kan sa plie ïa ka ‘Northeast Conclave’ bad buh ïa u maw nongrim jong ka Indian Institute of Corporate Affairs (IICA) ha Indian Institute of Management, Shillong. U Myntri Rangbah ka Jylla, u Conrad K. Sangma un ïadon bynta lang ha kane ka sngi kum Symbud Kongsan.
Ka Sitharaman kan leit jngoh ruh ïa ka Shillong Tech Park kaba don ha Umsawli bad kan plie ruh ïa ka jingpyni nam kaba pyni ïa ki nongrep bad ki nongseng kam lajong ha Lariti International Centre, Shillong.
Ha kane ka jingwan jngoh jong ka, ka Myntri kan sa ïashim bynta ruh ha ki prokram bapher-bapher bad ïakynduh ïa ki kynhun (bapher-bapher) ban khmih bniah ïa ki sienjam ba ïadei bad ki kam pynroi kumjuh ban ïakren bad ki nongïoh jingmyntoi ha kylleng ki bynta.
Na ka liang ka Myntri kan ïashim bynta ruh ha ka ban ïakren bad ki nongshim bynta ha ki kam karkhana ha Courtyard Marriott, Shillong, ha ka 12 tarik Naitung. Kane ka sngi kan kynthup ruh ïa ka jingïakren bad ki Women Self-Help Group, ki Lakhpati Didi, bad ki Seng Nongrep ha ka shnong Laitkynsew.
Nalor kata, ka Sitharaman kan ïakren bad ki nongïoh jingmyntoi na ka Payment for Ecosystem Services Program ha ka shnong Siej.
Kane ka jingleit jngoh kan kut da ka prokram paidbah ha ka shnong Sohbar, kawei na ki 96 tylli ki shnong ba la ithuh kum ka ‘Vibrant Village’.
Ha ka sngi khatduh jong ka jingwan jngoh jong ka, kata ha ka 13 tarik Naitung, kan sa leit jngoh ïa ka skul Ram Krishna Ashram kaba don ha Sohra.
