New Delhi, Nailur:
Ka jingïalang paidbah kaba nyngkong jong ka kynhun ka liang pyrshah ka INDIA kan sa lah ban long ha Nagpur ha Maharashtra, la ïathuh ka tyllong khubor.
Ïa ka jingïalang paidbah kumba la thmu ban pynlong ha Bhopal la weng noh namar ba la buh shwa da ka jingïalap (campaign) jong ka seng Congress ha kajuh ka por kumba la thmu ban pynlong ha kane kajuh ka por.
U dei u nongmihkhmat jong ka seng Congress bad u General Secretary jong ka seng u K.C. Venugopal, kumba la ïathuh ka tyllong khubor uba la ai jingmut ban pynlong ïa ka jingïalang paidbah kaba nyngkong ka ban sa pynlong ha Bhopal.
Kiba bun ki dkhot jong ka kynhun kiba la rai ban pynlong ïa ka jingïalang paidbah la ong ba yn sa lah ban pynlong ïa ka jingïalang paidbah kaba nyngkong ha Bhopal.
Shuh shuh la ong ba kane ka kynhun ka la rai ban pynlong ïa kane ka jingïalang ha ka 2 tarik, Risaw.
U Myntri Rangbah jong ka Bihar u Nitish Kumar uba la pynshisha da kaba ong ba ka seng BJP kaba bat ïa ka jingsynshar ha ka sorkar kmie ka la thmu ban wanrah shakhmat ne pynlong kham kloi ïa ka ilekshon Lok Sabha u la ong, “Ngi la long kiba la pynkhreh borabor”.
U nongïalam jong ka seng JDU, uba la pynkut noh ïa ka jingïatreilang bad ka seng BJP ha u snem ba la leit bad uba la trei shitom na ka bynta ban wanrah bad lumlang ïa kiba bun ki seng ka liang pyrshah na ka bynta ban thaw ïa ka kynhun synrop ka INDIA, u la ong ruh ba kiba bun ki seng ka liang pyrshah ki la don ha ka jingïatreilang.
“Nga la dep ban ong ba ka sorkar NDA ha ka sorkar kmie kan sa thmu ban pynlong kham kloi ïa ka ilekshon Lok Sabha. Ngi la long kiba la khreh borabor…Ai ba kin pynlong kloi ïa ka,” la ong u Kumar ha ka jingïakren bad ki nongthoh khubor.
U Myntri Rangbah u la kren ïa kine ki kyntien kum shi bynta ban ai jubab halor ki jingkylli kiba la wan na ki nongthoh khubor kiba la kwah ban tip shaphang ka jinglah jong ka seng ka liang pyrshah ban pyntreikam lada wan ne pynlong kloi ïa ka ilekshon Lok Sabha kumba la thmu da ka sorkar kmie.
“Ngi la ïatylli bad ïatreilang. Ngi la trei na ka bynta ki paidbah bad ngin sa ïai bteng ban shakri ïa ki. Ngi la leh ïa shibun ki kam pynroi ha Bihar. Naduh ka jingshna ïa ki surok kiba bha, ki jingkieng, ka jingpynïoh bording bad ka jingpynbiang ïa ka umbam umdih shaduh ka jingpyntreikam ïa ki project ba la buh ban pyntreikam, ngi la leh ïa shibun kiei kiei ha ka jylla. Ki nongjied ïa ki nongmihkhmat kin sa ai ïa ka rai kaba khatduh”.
