Aizawl, Nailur:
Ka sorkar kmie kan ym pynbiang da ka pisa ha kaba ïadei bad ka jingsiew kum ka bailutksan sha ki briew kiba mih na Manipur na ka jaka ba la shah ktah jur ha ka jingïakynad kiba don mynta ha ki jaka sah ba shipor ha Mizoram.
Ha ka jaka kane, ka sorkar kmie kan sa pynbiang ïa ki jingdonkam jong ki kiba man ka sngi kum ki jingbam bad ki dawai.
Ïa kane la pyntip da ka Ministry of home affairs (MHA) sha ka tnat ki kam pohïing jong ka Mizoram, la ïathuh ka tyllong khubor.
Kumba la ïathuh ka tyllong khubor, la ong ba u Home Commissioner jong ka Mizoram u H Lalengmawia u la pyntip ba kane ka dei ka jingpynbna ba la wan na ka sorkar kmie.
“Ka tnat ki kam pohïing ka la shu pyntip da ka jingphah ktien, bad ym lyngba ka shithi na ka bynta ban ai jingïarap sha ngi,” la ong u H Lalengmawia.
U H Lalengmawia u la ong: “Ha ka jingbuh jingkyrpad jong ngi sha ka tnat ba dei khmih, ngi la dep ban pynkhreh ïa ka thup jong ki jingdonkam na ka bynta ban phah da hynriew bnai u khaw, ki jingbam shyieng, u phan, ka umphniang bam, u piat, ki dawai, bad kiwei pat ki jingdonkam ha ka ban ai jingsumar bad kiwei pat.”
Kane ka jingphah ktien jong ka MHA ka la long kum ka jingai jubab halor ka shithi ba la phah ha ka 23 tarik, Jymmang na u Myntri Rangbah jong ka Mizoram u Zoramthanga sha u Myntri ka sorkar kmie uba dei khmih ïa ka tnat ki kam pohïing u Amit Shah.
Ha ka shithi sha u Myntri ka tnat ki kam pohïing, u Zoramthanga u la pan jingïarap da kumba T. 10 klur ka pisa na ka bynta ban pynbiang ki jingïarap sha ki nong Manipur kiba la leit ban buhai shnong ha ki 11 tylli ki distrik jong ka Mizoram.
Ka Mizoram ka la don ïa kumba 11,973 ngut ki briew ki bym don jaka sah kiba wan na Manipur kumba la ïoh lum jingkheiñ haduh ka 23 tarik, Nailur.
