Mumbai, Nailur:
U Symbud Myntri Rangbah jong ka Maharashtra u Ajit Pawar hynnin ka sngi u la ong ba un sa pdiang ïa ka rai kaba khatduh jong ka Election Commission of India (ECI) ha kaba ïadei bad ka kyrteng jong ka seng NCP lem bad ka shap, ha kaba ïadei bad ki jingkam ba la phah lyngba ki jingthoh da ka kynhun ba la ïalam ma u bad ka jong u Sharad Pawar.
ïa kane u la ïakren bad ki nongthoh khubor ha Pune habar jong ki ïing dara jong u Lord Ganesh kiba don ha kylleng ki jaka kiba u la leit jngoh, la ïathuh ka tyllong khubor.
U Ajit Pawar u la ïalam ïa 8 ngut ki MLAs ba kin leit ban pynïasoh bad ka sorkar synrop jong ka Shiv Sena-BJP ha Maharashtra ha u Naitung, la ong ka tyllong khubor.
U Pawar u la kam ïa kiba bun ki MLA jong ka seng NCP kaba la seng da u pasan jong u u Sharad Pawar, bad u la pynshisha ba u la buh ïa ka kyrteng jong ka seng bad ïa ka shap jong ka ha ka rai jong ka ECI.
Ka kynhun jong u Sharad Pawar ka la kob ïa u Ajit Pawar hakhmat ka kynhun ba dei khmih halor ki kam ilekshon bad ka rai halor kane ka dang sah.
Haba la buh jingkylli shaphang ka kynhun jong u Sharad Pawar kaba la pynibor pyrshah ïa ki MLA kiba la leit ban pynïasoh bad ka kynhun jong u, u Ajit Pawar u la ong ba kin sa khmih bniah ha kaba ïadei bad ki hok jong ki, la ïathuh ka tyllong khubor.
“Ha kaba ïadei bad kane, la ong ba ka dei ka Elections Commission (EC) ka ban ai ïa ka rai kaba khatduh. Baroh arliang ki la leit hakhmat ka ECI bad baroh kin sa buh hakhmat ïa ki nongrim ha ki tarik ba la buh. Katba nga dang don ka jingsngew halor kane, ngan pdiang ïa ka rai jong ka ECI,” u la ong ha ka jingkren jong u bad ki nongthoh khubor.
