Guwahati, Nailur:
Ka seng Congress ha Manipur ha ka Lah Sngi U Blei ka la dawa ïa u Myntri Rangbahduh u Narendra Modi ba un leit ban jngoh ïa ka jylla kaba la shah ktah jur na ki jngïakynad bad ban pynphai noh ka jingsuk bad ka jingïaid beit ïaid ryntih ki jinglong jingman kham kloi katba lah.
U heh nongaiktien jong ka seng Congress ha Manipur u Ningombam Bupenda Meitei u la ong ba u nongïalam jong ka seng Congress u Rahul Gandhi u la dep ban leit jngoh ïa ka jylla naduh ka 29 tarik, haduh 30 tarik, Jylliew bad ïakren bad ki briew jong ki arliang mamla bad ki lanot kiba don ha ki jaka sah ba shipor ha kylleng ki jaka, hynrei u Myntri Rangbahduh um lap por ban leit jngoh ïa ka jylla.
“U Myntri Rangbahduh u la leit jngoh ïa kiba bun ki jylla jong ka ri bad kumjuh shabar ri ruh, hynrei u la kiar ban leit jngoh ïa ka Manipur wat lada ka la don hapdeng ki kynrum kynram bad ki jingïaumsnam ha kaba ka dang ïai bteng mynta bad ka la jan dap san bnai,” la ong u Meitei, uba long ruh u dkhot jong ka AICC, ha ka jingïakren bad ki nongthoh khubor.
U nongïalam jong ka seng Congress u la bthah ïa u Myntri Rangbah jong ka Manipur u N Biren Singh ba un pynbeit na ka bynta ban ïakynduh bad u Myntri Rangbahduh khnang ba ka kynhun nongmihkhmat na ka jylla kin ïoh ban ïakynduh bad u bad ki MLA jong ka seng Congress ki la dep lypa ban pynsngew ba kin synran ïa ka kynhun nongmihkhmat la ka long ha kano kano ka por.
