Pynbna ka ïingbishar ban pynjlan sngi ha ka ban set patok ïa u Chandrababu Naidu

Amaravati, Nailur:

Ka jingshah set patok jong u heh nongïalam jong ka seng TDP u N Chandrababu Naidu halor ka jingshah kynnoh ba u la donkti ha ka kam bamsap kaba la mih na ka Skill Development Corporation ka la nang jlan sha ka 5 tarik, Risaw kumba la pynbna da ka ADB Court ha Vijayawada.

Hashwa kane, une heh nongïalam jong ka seng TDP u la shah kylli jingkylli ha ki heh jong ka kynhun CID hapoh patok.

Ki heh jong ka kynhun tohkit ki la buh ka jingkyrpad ïa ka ïingbishar ba kan pynjlan sngi shuh shuh ha kaba ïadei bad ka jingset ïa u Naidu namar ba ki kwah ban bteng ïa ka jingtohkit.

Ka nongbishar jong ka ïingbishar ka Hima Bindu ka la pynbna ba la nang pynjlan sngi shuh shuh da kumba 11 sngi hadien ba ki heh jong ka kynhun CID ki la phah ka jingkyrpad.

Ha ka 26 tarik, Nailur, baroh kawei ka jylla Karnataka ka la khot pynlong da ka jingïakhih ban pyrshah jur halor ka jingshakem jong u heh nongïalam ka seng.

U Naidu u la shahkem ha ka 9 tarik, Nailur halor ka jingshah kynnoh ba u la bamsap ha ka por ba u dang bat ïa ka kam kum u Myntri Rangbah bad u la shah rai set patok haduh ka 22 tarik, Nailur ha Rajahmundry Central Jail.

Ha ka sngi Thohdieng jong ka taïew ba la lah, ka ïingbishar ka la pynbna ba yn pynjlan sngi shuh shuh ban set patok biang ïa u haduh ka 24 tarik, Nailur.

Ka Andhra Pradesh High Court ka la kyntait ïa ka jingkyrpad jong u Naidu ban phah weng noh ïa ka jingujor ejahar kaba long pyrshah ïa u.